سیاسی جوڑ توڑ کی بجائے انداز بیان میں لفظوں کے جوڑ توڑ کے ماہر سینیٹر سیاست دان حافظ حسین احمد انتقال کر گئے۔ قومی اسمبلی اور سینیٹ کے ممبر رہے۔

:محمد ندیم قیصر (ملتان)

:تفصیلات

سیاسی جوڑ توڑ کی بجائے انداز بیان میں لفظوں کے جوڑ توڑ کے ماہر سینیٹر سیاست دان حافظ حسین احمد انتقال کر گئے ۔74 برس کے حافظ حسین احمد کو گفت و شنید کے میدان میں تو کوئی شکست نہ دے سکا لیکن گردوں کے عارضہ کے ہاتھوں زندگی کی بازی ہار گئے۔جمیعت علما ئے اسلام کے پلیٹ فارم سے سیاست کی اور تادم آخر اسی جماعت کے ساتھ وفا نبھائی دو بار قومی اسمبلی کے ممبر بنے ۔سینیٹ کس بھی حصہ رہے۔حافظ حسین احمد 1951ء میں کوئٹہ کے ایک مذہبی گھرانے میں پیدا ہوئے۔ ابتدائی تعلیم قرآن، حدیث، فقہ اور عربی ادب میں حاصل کی۔ سیاسی کیریئر کا آغاز انہوں نے 1973ء میں بلوچستان کی سیاست سے کیا۔ وہ دو مرتبہ قومی اسمبلی کے رکن منتخب ہوئے، مارچ 1991ء سے مارچ 1994ء تک سینٹ کے رکن بھی رہے۔ حافظ حسین احمد پاکستان نیشنل الائنس کے اہم رہنماؤں میں بھی شمار ہوتے تھے۔

حافظ حسین احمد لفظوں کے جوڑ توڑ میں سوال جواب کے سیشن میں منہ توڑ جواب دینے کا ہنر بخوبی جانتے تھے۔

حافظ حسین احمد کے طرز سیاست نے ایک مدبر سیاست دان کے روپ میں شناخت دی وہ لفظوں کے جوڑ توڑ میں سوال جواب کے سیشن میں منہ توڑ جواب دینے کا ہنر بخوبی جانتے تھے۔ عوامی جلسہ ۔ اسمبلی ۔پارلیمنٹ کا ایوان یا میڈیا کے ساتھ نشست ہر مقام پر انداز گفتگو تبدیل ہوتا وہ ملکی وبین الاقوامی ایشوز بارے بھلے چبھتے جملوں کا انتخاب کرتے لیکن طنزو مزاح کے ایسے انداز میں پیش کرتے کہ نشاندھی بھی ہوجاتی اور بھرم بھی رہ جاتا تھا ان کے اس انداز جُداگانہ نے اپنے پرائے سب کو ان کا گرویدہ بنا رکھا تھا۔نجی یا عوامی اجتماعات میں ملنساری کا اظہار بھی ان کی مقبولیت کا باعث بنا ۔

دینی سیاسی خدمات کو وزیراعظم محمد شہباز شریف۔ مولانا فضل الرحمان ۔بلاول بھٹو ۔ صادق سنجرانی کا خراج عقیدت ۔

وزیراعظم محمد شہباز شریف جمعیت علمائے اسلام مولانا فضل الرحمان ۔پیپلز پارٹی کے چیئرمین بلاول بھٹو اور سابق چیئرمین صادق سنجرانی نے حافظ حسین احمد انتقال پر گہرے رنج و غم دکھ کا اظہار کیا اور ان کی دینی و سیاسی خدمات کو خراجِ عقیدت پیش کیا ہے۔

وزیرِ اعظم محمد شہباز شریف نے جمیعت علماء اسلام ف کے رہنما و سینئیر سیاستدان حافظ حسین احمد کے انتقال پر گہرے دکھ اور رنج کا اظہار کرتے ہوئے کہا کہ حافظ حسین احمد ایک مدبر سیاستدان تھے. دکھ کی گھڑی میں پوری قوم کی ہمدردیاں مرحوم کے اہل خانہ کے ساتھ ہیں. دعا ہے کہ اللہ تعالی حافظ حسین احمد کی مغفرت ۔ درجات بلند اور اہل خانہ کو صبر جمیل عطا فرمائے۔

پیپلز پارٹی کے چیئرمین بلاول بھٹو نے کہا کہ حافظ حسین احمد اختلاف رائے کا ہنر بھی بخوبی جانتے تھے اور ان کی شخصیت کو مدبر سیاست دان کی حیثیت سے یاد رکھا جائے گا۔

سابق چیئرمین سینیٹ صادق سنجرانی نے کہا کہ مرحوم حافظ حسین احمد انتہائی نفیس، ملنسار اور محبت کرنے والے شخص تھے اور ہم سوگوار خاندان کے دکھ اور غم میں برابر کے شریک ہیں۔مرحوم حافظ حسین احمد کی ملک کے لئے خدمات ہمیشہ یاد رکھی جائیں گی۔