ڈیرہ غازی خان اور ملتان کے درمیان شٹل ٹرین چل پڑی۔ ڈیرہ غازی خان میں افتتاحی تقریب۔ وفاقی وزراء حنیف عباسی اور اویس لغاری بھی شریک

:محمد ندیم قیصر(ملتان)

:تفصیلات

 ڈیرہ غازی خان اور ملتان کے درمیان شٹل ٹرین چل پڑی۔ ڈیرہ غازی خان میں منعقدہ افتتاحی تقریب میں وفاقی وزیر توانائی سردار اویس احمد خان لغاری اور وفاقی وزیر ریلوے حنیف عباسی نے ڈیرہ غازی خان اور ملتان کے درمیان چلنے والی شٹل ٹرین کا افتتاح کر دیا۔ ڈیرہ غازی خان ریلوے سٹیشن پر افتتاحی تقریب سے خطاب کرتے ہوئے وفاقی وزراءنے کہا کہ شٹل ٹرین چلنے سے ملتان، ڈیرہ غازی خان سمیت جنوبی پنجاب کے دیگر شہروں کے عوام کو بہترین سفری سہولیات میسر آئیں گی۔مسلم لیگ ن کی حکومت عوامی مسائل کے حل کیلئے کوشاں ہے،ملک کی 24 کروڑ پاک فوج کے ساتھ کھڑی ہے،دہشت گرد بزدلانہ کارروائیوں سے ہماری ترقی کا سفر نہیں روک سکتے۔

برسوں سے بند ڈیرہ ریلوے سٹیشن بحال۔ ٹرین افتتاحی تقریب میں بجلی ریلیف کا خصوصی ذکر۔مہنگائی پر جلد قابو پانے کا دعویٰ

وفاقی وزراءنے ٹرین افتتاحی تقریب میں حکومت کے بجلی ریلیف پیکیج کا بھی خصوصی ذکر کیا اور مہنگائی پر جلد قابو پانے کا دعویٰ کیا۔انہوں نے کہا کہ وزیر اعظم نے 7 روپے 41 پیسہ فی یونٹ بجلی سستی کرکے عوام کو تحفہ دیا یونکہ یہاں پر کئی برس سے بند ریلوے سٹیشن آج دوبارہ بحال کیاجارہاہے اورریلوے سٹیشن پر موجود عوام کی بڑی تعداد اس بات کی گواہی دے رہی ہے کہ مسلم لیگ ن جب بھی برسراقتدار آئی ہے انہوں نے عوامی فلاحی منصوبوں کو ترجیحی بنیاد پر کام کیاہے ۔انہوں نے کہاکہ ایک برس قبل جب ہماری حکومت برسراقتدار آئی تو پاکستان کو بے شمار چیلنجز کا سامناتھا،ہرطرف پریشانی کاعالم تھا ۔ وفاقی وزیرتوانائی اویس لغاری نے کہا کہ آج ڈیرہ عوام مہنگائی بے روز گاری اوریقینی صورتحال سے پریشان تھی ۔انہوں نے کہاکہ بین الاقوامی سطح پر بھی پاکستان کی معاشی صورت حال غیر تسلی بخش تھی اور مہنگی بجلی کی وجہ سے عوام پریشان تھی مگر ایک سال کے اندر وزیراعظم میاں شہباز شریف کی قیادت اورمحمد نواز شریف کی رہنمائی میں پاکستان اب ترقی کاسفر شروع کر چکا ہے اور وزیراعظم میاں شہباز شریف کی سب سے زیادہ توجہ مہنگائی پرقابو پاناہے ۔غازیخان کی عوام کے لئے بڑی خوشی کادن ہے۔

ملک کے بڑے سیٹھوں کی جیب پر ہاتھ ڈالا گیا اور 3400ارب روپے کی وصولی۔ اویس لغاری نے پی ٹی آئی کو بھی آڑے ہاتھوں لیا

وفاقی وزیر اویس لغاری نے مزید کہا کہ حکومت نے سب سے پہلے ملک کے بڑے سیٹھوں کی جیبوں پر ہاتھ ڈالا اوران سے 3400ارب روپے کی وصولی کی ہے ۔انہوں نے کہاکہ بجلی بل ریلیف کے حوالے سے مزید کہا کہ اویس لغاری نے پی ٹی آئی کو بھی آڑے ہاتھوں لیا اور کہاکہ جب پاکستان تحریک انصاف برسراقتدار تھی تو ڈیرہ غازیخان کی عوامی کا کوئی پرسان حال نہیں تھا اورنہ ہی یہاں پرکوئی عوامی فلاحی منصوبے شروع کئے گئے جبکہ موجودہ حکومت نے ڈیرہ غازیخان میں سردار فاروق لغاری انٹر نیشنل ایئرپورٹ کو بحال کیا،اس حوالے سے کام تیزی سے جاری ہے انڈس ہائی وے کو دورویہ کرنے اورکینسر ہسپتال کے حوالے سے بھی کام کیاجارہاہے ۔انہوں نے کہاکہ ڈیرہ غازیخان کاریلوے سٹیشن گزشتہ کئی برس سے بند پڑاتھاآج اس کو ڈیرہ غازیخان اورملتان کے درمیان شٹل ٹرین چلا کردوبارہ بحال کیاجارہاہے ۔اس وقت 3کروڑ 30 لاکھ بجلی کے صارفین ہیں جن میں سے ایک کروڑ 75لاکھ صارفین 200یونٹ سے کم یونٹ استعمال کرنے والے ہیں انہیں بھی بجلی 7روپے 41 پیسے مزید سستی ملے گی۔وفاقی وزیر اویس لغاری نے اپنی تقریر میں وفاقی وزیرریلوے حنیف عباسی کو مخاطب کرتے ہوئے کہا ڈیرہ کی عوام آپ سے اظہار تشکر کیلئے جمع ہے کہ آپ نے ہمارے شہر کے ریلوے سٹیشن کی رونق بحال کی ہے ۔

ڈیرہ ملتان شٹل چل پڑی ۔24 اپریل سے خوشحال خان خٹک ٹرین بھی بحال۔ وفاقی وزیر ریلوے حنیف عباسی

اس موقع پرخطاب کرتے ہوئے وفاقی وزیر ریلوے حنیف عباسی نے کہاکہ میرے ڈیرہ غازیخان آنے کامقصد یہاں کے عوام میں خوشخبریاں بانٹنا ہے۔ آج یہاں سے شٹل ٹرین کاافتتاح کیاجارہاہے جو ڈیرہ غازی خان اورملتان کے درمیان روزانہ کی بنیاد پر چلے گی اس کے علاوہ 24اپریل کو خوشحال حال خان خٹک ٹرین کو بھی بحال کیاجارہے جوکراچی سے براستہ ڈیرہ غازیخان پشاور تک جائے گی ۔انہوں نے کہاکہ پاکستان ریلوے کی اس سروس کوکامیاب بنانے کے لئے میں جنوبی پنجاب کے عوام سے تعاون کی درخواست کروں گا تاکہ ہم جلد یہاں سے فریٹ ٹرین کابھی آغاز کرسکیں ۔انہوں نے کہاکہ پاکستان ریلوے کی ترقی کاپہیہ عوام کی دلچسپی سے جڑا ہے انہوں نے کہاکہ سردار اویس خان لغاری نے خواہش ظاہر کی تھی کہ ڈیرہ غازیخان کے ریلوے سٹیشن کی رونق دوبارہ بحال کی جائیں تومیں نے اس پر کام شروع کردیا۔اور توقع رکھتا ہوں وہ اس شٹل ٹرین کامیاب بنائیں گے۔

مسلم لیگ ن ہی ملک کوبحران سے نکالنے کی صلاحیت رکھتی۔ دوست ممالک کو بھی منایا جا رہا ہے

وفاقی وزیر حنیف عباسی نے کہاکہ ایک شخص نے گزشتہ دور حکومت میں ملک کی نوجوان نسل کوگمراہ کرنے کی پوری کوشش کی مگر آج کا نوجوان سمجھ چکاہے کہ پاکستان مسلم لیگ ن ہی ملک کوبحران سے نکالنے کی صلاحیت رکھتی ہے ۔انہوں نے کہاکہ وزیراعظم محمد شہباز شریف نے بھرپورکوشش کرکے ناراض دوست ممالک سعودی عرب ،چین ،متحدہ عرب امارات اور ترکی سمیت دیگر ممالک کو راضی کیا کیونکہ یہ دوست ممالک گزشتہ دور حکومت کے وزیراعظم کی غلط پالیسیوں کی وجہ سے ہم سے ناراض ہوگئے تھے۔

ریلوے ملازمین فیملیز کے معیار زندگی کو بہتر بنانے کے لئے کوشاں۔ڈیرہ سے لاہور تک ٹرین سفر کی خوشخبری

وفاقی وزیر ریلوے حنیف عباسی نے مزیدکہاکہ ہم ریلوے ملازمین اوران کے اہلخانہ کی معیار زندگی کو بہترکرنے کے لئے بھی کام کررہے ہیں اوران ملازمین کے بچوں کو بہتر صحت اورتعلیم کی سہولیات فراہم کرنے کے لئے اقدامات کر رہے ہیں ۔اس شٹل ٹرین کے آغاز سے ڈیرہ غازیخان اورراجن پور کی عوام لاہور ،اسلام آباد اورکراچی کاسفر ملتان ریلوے سٹیشن سے بھی شروع کرسکیں گے ۔وزیر ریلوے نے کہاکہ وزیراعلیٰ پنجا ب مریم نواز اپنے صوبے کی عوام کی فلاح وبہبود کے لئے جنگی بنیادوں پرکام کر رہی ہیں آج میں ڈیرہ غازیخان سمیت پنجاب کے دیگر شہروں میں میں جاکر دیکھتا ہوں تو مجھے محسوس ہوتاہے کہ وزیراعلیٰ پنجاب اپنے صوبے میں صحت ، تعلیم اور شاہرائوں کی بہتری ٹرانسپورٹ کے موثر نظام سمیت دیگر منصوبوں پر بھرپورکام کررہی ہیں ۔

دہشت گرد ٹرین ڈرائیور کو نہ ڈرا سکے۔ پاک فوج کیا ڈرے گی۔ وفاقی وزیر حنیف عباسی

وفاقی وزیر حنیف عباسی نے کہاکہ میں دہشت گردوں کو یہ پیغام دینا چاہتاہوں کہ آپ کی بزدلانہ کارروائیوں سے جعفر ایکسپریس کا ڈرائیور تک نہیں ڈرا تو پاک فوج کیسے آپ سے ڈر سکتی ہے ۔انہوں نے کہاکہ دشمن کو پتہ ہے کہ پاکستان ایک ایٹمی طاقت ہے اوروہ اپنی گھٹیا حرکتوں سے پاکستان کو کمزور کرناچاہتاہے مگر اسے یہ معلوم نہیں کہ پاکستان کے 24 کروڑ عوام اس کے نظریہ کے محافظ ہیں اوردشمن کومنہ توڑ جواب دینے کے لئے پاک ۔فوج کے ساتھ کھڑے ہیں ۔انہوں نے کہاکہ دشمن ہماری صفوں میں دراڑ پیدا نہیں کرسکتا۔

سرائیکی ،بلوچ ،سندھی پختون ،پنجابی اوراقلیتی عوام مل کر ملک کی بہتری کے لئے کوشاں

وزیر ریلوے حنیف عباسی نے اظہار یکجہتی کا پیغام دیتے ہوئے کہا کہ سرائیکی ، بلوچ ،سندھی پختون ، پنجابی اور اقلیتی عوام مل کر ملک کی بہتری کے لئے کوشاں ہیں ۔انہوں نے کہاکہ وفاقی حکومت بلوچستان کے مسائل ترجیحی بنیادوں پر حل کررہی ہے اورہم سب نے مل کر دشمن کے عزائم کوناکام بناناہے ۔قبل ازیں وفاقی وزیر سردار اویس احمد خاں لغاری اوروفاقی وزیرریلوے حنیف عباسی ڈیرہ غازیخان ریلوے سٹیشن پہنچے تو عوام نے ان کا پرتپاک استقبال کیا ان پر پھولوں کی پتیاں نچھاور کی اورپاکستان زندہ باد کے نعرے لگائے۔