Admin
:محمد ندیم قیصر (ملتان)
:تفصیلات
قوم اور افواج ۔ ایک جان ۔جاگ اٹھا ہے پاکستان۔ بھارتی پروپیگنڈا کے خلاف ملتان پریس کلب کے زیر اہتمام ریلی نکالی گئی ۔ وفاقی وزیر اطلاعات عطاء اللہ تارڑ نے؎بھارتی میڈیا کو منہ توڑ جواب دینے پر خراج تحسین پیش کیا۔صدر ملتان پریس کلب شکیل انجم کی قیادت میں نکالی گئی ریلی میں شرکاء نے بینرز اٹھا رکھے تھے اور ان بینرز پر پاکستان کی بری بحری اور فضائی افواج کا حوصلہ بڑھانے کیلئے خیرمقدمی سلوگن درج تھے۔ ریلی کے دوران نعرے لگائے کہ سرحدوں کی محافظ افواج پاکستان کو سلام۔ پاک فوج قدم بڑھاؤ قوم تمھارے ساتھ ہے ۔ بھارتی وزیر اعظم نریندر مودی کی دھمکیوں کی بھرپور مذمت کرتے ہوئے شرکاء نے واضح پیغام دیا کہ لا الہ الااللہ کے ماننے کسی سے نہیں ڈرتے۔ صدر شکیل انجم نے کہا کہ پلوامہ فالس حملہ کے بعد بھی بھارتی فورسز کو منہ کی کھانا پڑی تھی اب 6 برسوں بعد پہلگام واقعہ میں اپنے حفاظتی انتظامات کی ناکامی کا اعتراف کرنے کی بجائے پاکستان پر ملبہ گرانے والی مودی سرکار یاد رکھے کہ افواج پاکستان ہمہ وقت تیار ہے اور ابھی نندن جیسی کسی بھی سرگرمی کا منہ توڑ جواب دیا جائے گا۔
پاکستانی میڈیا نے بھارتی پروپیگنڈا کا منہ توڑ جواب دیا خدمات کو سنہری حروف میں لکھا جائے گا۔ وفاقی وزیر عطاء اللہ تارڑ
وفاقی وزیر اطلاعات و نشریات عطاء اللہ تارڑ نے بھارت کی جانب سے پاکستانی ٹی وی چینلز اور متعدد یو ٹیوب چینلز کو بھارت میں بند کرنے کے اقدام پر ملکی میڈیا اداروں، صحافیوں اور اینکر پرسنز سے ٹیلیفونک رابطہ کیا اور قومی بیانیہ کے موثر دفاع اور بھارتی پروپیگنڈے کے خلاف پاکستان کے موقف کو دنیا کے سامنے مدلل انداز میں پیش کرنے پر انہیں خراج تحسین پیش کیا۔ انہوں نے کہا کہ بھارتی حکومت نے اپنی شرمندگی اور خفت چھپانے کے لیے پاکستانی چینلز پر پابندیاں عائد کیں لیکن ان اقدامات سے حقائق دبائے جا سکتے ہیں نہ ہی پاکستان کا موقف دنیا سے چھپایا جا سکتا ہے۔ بھارت کا بیانیہ عالمی سطح پر مکمل طور پر ناکام ہو چکا ہے جبکہ پاکستانی میڈیا نے موجودہ صورتحال میں پیشہ ورانہ مہارت، ذمہ داری اور حب الوطنی کا مظاہرہ کرتے ہوئے مثالی کردار ادا کیا۔ پاکستانی میڈیا نے بھارتی پروپیگنڈے کا موثر جواب دیا اور عالمی برادری کے سامنے پاکستان کا موقف واضح انداز میں پیش کیا جس پر وہ خراج تحسین کے مستحق ہیں۔ حکومت پاکستان ان میڈیا اداروں اور صحافیوں کی مکمل حمایت جاری رکھے گی جو قومی وقار کو بلند کرنے اور بیانیے کے فروغ میں اپنا کردار ادا کر رہے ہیں۔ حکومت ہر اس آواز کی حوصلہ افزائی کرے گی جو ملک کی سالمیت، وقار اور قومی بیانیے کی ترویج میں معاون ہو۔ عطاء اللہ تارڑ نے زور دیا کہ بھارتی حکومت کا پاکستانی ٹی وی چینلز اور یوٹیوب پلیٹ فارمز پر قدغن لگانا صحافت کے عالمی اصولوں کی صریحاً خلاف ورزی ہے۔ حکومت پاکستان اس معاملے کو متعلقہ بین الاقوامی فورمز پر بھی اٹھائے گی تاکہ دنیا بھارتی قدغنوں سے آگاہ ہو سکے۔ پاکستانی میڈیا نے حالات کی نزاکت کو مدنظر رکھتے ہوئے قومی مفادات کو ترجیح دی اور انتہائی متوازن اور ذمہ دارانہ رپورٹنگ کی مثال قائم کی۔ پاکستانی صحافیوں اور اینکر پرسنز نے پیشہ ورانہ دیانتداری سے اپنی ذمہ داریاں نبھائیں اور ان کی خدمات کو سنہری حروف میں لکھا جائے گا۔
