قانون نافذ کرنے والے اداروں کی شبانہ روز محنت سے یوم عاشور پر امن گذر گیا: وزیر داخلہ محسن نقوی

: محمد ندیم قیصر (ملتان)

: تفصیلات

وزیر داخلہ محسن نقوی نے کہا ہے کہ الحمد للّٰہ حکومتی اقدامات اور قانون نافذ کرنے والے اداروں کی شبانہ روز محنت سے عاشورہ پر امن گذر گیا دشمن کے ناپاک عزائم نہ پہلے کامیاب ہوئے اور نہ اب ہوں گے،فتنہ الہندوستان کے مذموم عزائم ناکام بنانے کے لئے قانون نافذ کرنے والے ادارے مکمل چوکس ہیں-
ترجمان وزارت داخلہ کی طرف سے جاری بیان کے مطابق ملک بھر میں 9 ویں اور یوم عاشور پرمحرم الحرام کے جلوسوں اور مجالس کے لئے سکیورٹی کے فول پروف انتظامات کئے گئے ، اسلام آباد باد سمیت پنجاب، خیبر پختونخوا، بلوچستان، سندھ، آزاد کشمیر و گلگت بلتستان میں 2763 جلوس نکالے گئے اور 7598 مجالس کا انعقاد کیا گیا انتہائی حساس قرار دیئے 1129 علاقوں میں غیر معمولی سکیورٹی اقدامات اور ڈرونز و سی سی ٹی کیمروں سے نگرانی کو یقینی بنایا گیا- وفاقی حکومت کے مرکزی مانیٹرنگ سیل سے 7 /24 نگرانی جاری رہی، صوبائی حکومتوں کے ساتھ مؤثر کوآرڈینیشن ہے، وفاقی وزیرداخلہ محسن نقوی، وزیر مملکت طلال چوہدری اور سیکرٹری داخلہ خرم آغا خود تمام مانیٹرنگ کے عمل کی نگرانی و کوآرڈینیشن میں مصروف عمل رہے 

ایام محرم الحرام کے بعد بھی مذہبی منافرت اور فرقہ وارانہ بیانات پر زیرو ٹالرنس پالیسی۔

وزارت داخلہ کے ترجمان نے کہا کہ اسلام آباد میں یوم عاشور پر 61 مجالس اور 17 جلوس، پنجاب میں 3805 مجالس اور 1677 جلوس نکالے گئے- سندھ میں عزادار 1207 مجالس 644 جلوس اور خیبر پختونخوامیں 939 مجالس و 261 جلوس نکالے گئے ہیں- بلوچستان میں 115 مجالس، 11 جلوس، گلگت بلتستان میں 1290 مجالس، 111 جلوس اور آزاد کشمیر میں 181 مجالس، 42 جلوس نکالے گئے- ایام محرم الحرام پر امن عامہ یقینی بنانے کیلئے قانون نافذ کرنے والے ادارے مکمل الرٹ رہے – قیام امن کیلئے صوبائی حکومتوں نے مشاورت سے سکیورٹی پلان تشکیل دیا گیا – مذہبی منافرت اور فرقہ وارانہ بیانات پر زیرو ٹالرنس پالیسی ہے- مرکزی کنٹرول روم کے ساتھ صوبائی سطح پر کنٹرول رومز فعال کئے گئے ہیں -وزیر داخلہ محسن نقوی نے کہا کہ سوشل میڈیا پر مذہبی اشتعال انگیزی کسی صورت نہ پہلے برداشت کی اور نہ آئندہ برداشت کی جائے گی۔ امن و امان برقرار رکھنا اولین ترجیح ہے۔ محسن نقوی نے کہا کہ فتنہ الہندوستان کے مذموم عزائم ناکام بنانے کے لئے قانون نافذ کرنے والے ادارے مکمل چوکس ہیں۔ ان شاء اللہ حکومتی اقدامات اور قانون نافذ کرنے والے اداروں کی شبانہ روز محنت سے عاشورہ پر امن گذر گیا۔ وزیر داخلہ نے کہا کہ دشمن کے ناپاک عزائم نہ پہلے کامیاب ہوئے اور نہ اب ہوں گے۔