امیر جماعت اسلامی پاکستان حافظ نعیم الرحمان کا ملتان اور مظفرگڑھ میں الخدمت خیمہ بستیوں کا دورہ، متاثرین کے حق کے لیے جدوجہد جاری رکھنے کا عزم

:محمد ندیم قیصر (ملتان)

: تفصیلات

امیر جماعت اسلامی پاکستان حافظ نعیم الرحمان نے ملتان اور مظفرگڑھ میں الخدمت خیمہ بستیوں کا دورہ کیا٬متاثرین کے حق کے لیے جدوجہد جاری رکھنے کے عزم کا اظہار کیا٬
امیر جماعت اسلامی حافظ نعیم الرحمان نے سیلاب متاثرین کی بحالی کے لیے حکومتی فنڈز کی فوری فراہمی اوربااختیار بلدیاتی نظام کی بحالی کا مطالبہ کیا اورکہا کہ حکومت جنوبی پنجاب میں مچھلی فارمز کے مالکان کو بلا سود قرض دے اور متاثرہ علاقوں بالخصوص مظفرگڑھ کو آفت زدہ قرار دیا جائے۔
امیر جماعت اسلامی پاکستان نے بدھ کے روز جنوبی پنجاب کے سیلاب زدہ علاقوں اور الخدمت فاؤنڈیشن کی جانب سے لنگر سرائے، مظفر گڑھ اور شیر شاہ ملتان میں متاثرین کے لیے قائم کی گئی خیمہ بستیوں کا دورہ کیا تو اس موقع پر انہوں نےرضاکاران، متاثرین اور صحافیوں سے گفتگو بھی کی، اس موقع پر امیر صوبہ سید ذیشان اختر، الخدمت کے سیکریٹری وقاص انجم جعفری، قیم صوبہ صہیب عمار صدیقی اور دیگر قائدین بھی موجود تھے۔

امیر جماعت اسلامی نے حکومت پر زور دیا کہ آبی ذخائر کی بروقت تعمیر ممکن بنائے تاکہ آئندہ اتنی بڑی تباہی سے بچا جاسکے۔ انھوں نے ملک میں واٹر مینجمنٹ سسٹم کی خامیوں کا تذکرہ کیا اور کہا کہ دریائے چناب پر ہیڈ محمد والا پل کی بروقت توسیع کر دی جاتی توملتان اور نواحی علاقوں میں بڑے پیمانے پر نقصانات سے بچا جا سکتا تھا۔ حافظ نعیم الرحمان نے کہا کہ صوبائی حکومتیں خزانے ذاتی تشہیر کی بجائے اختیارات نچلی سطح پر منتقل کریں اور غیر ضروری اخراجات ختم کرکے سیلاب متاثرین کی بحالی پر پیسہ خرچ کیاح جائے۔
امیر جماعت اسلامی کا کہنا تھا کہ جماعت اسلامی صوبہ بہاولپور اور صوبہ جنوبی پنجاب دونوں کے قیام کی حامی ہے۔ انہوں نے سوال اٹھایا کہ جب اسمبلی میں صوبوں کے قیام کی قرارداد منظور ہو چکی ہے تو اس پر عملدرآمد کیوں نہیں کیا جا رہا؟ انہوں نے کہا کہ سیلاب سے چالیس لاکھ کے قریب لوگ متاثر ہوئے، فصلیں تباہ ہوگئی، جانور پانی میں بہہ گئے، مچھلی فارمز کے مالکان کا کروڑوں کا نقصان ہوا، تباہ کاریاں ابھی جاری ہیں اور اسی دوران آٹے کی قیمتوں میں مسلسل اضافہ ہو رہا ہے، عام آدمی دو وقت کی روٹی کے لئے پریشان ہے۔
نااہل حکمران اسٹیبلشمنٹ کی حمایت سے عوام پر مسلط ہیں، ان سے جان چھڑوانا ہو گی۔ حکمران محض سیاسی پوائنٹ اسکورنگ کرتے ہیں، جماعت اسلامی عوام کے ساتھ کھڑی ہے اور متاثرین کے نقصان کا ازالہ کرائے گی۔ عوام اپنے حقوق کے حصول کے لیے جماعت اسلامی کا ساتھ دے۔