قذافی سٹیڈیم کو ریکارڈ مدت میں دنیا کے جدید ترین کرکٹ میدان میں ڈھالنے والے مزدوروں کے اعزاز میں چیئرمین پی سی بی محسن نقوی کا چٹ پٹا ظہرانہ

:محمد ندیم قیصر (ملتان)

:تفصیلات

قذافی سٹیڈیم کو ریکارڈ مدت میں دنیا کے جدید ترین کرکٹ میدان میں ڈھالنے والے مزدوروں کے اعزاز میں چیئرمین پی سی بی محسن نقوی کی جانب سے چٹ پٹے ظہرانہ کا اہتمام کیا گیا جس میں قذافی سٹیڈیم کی 1500 سے زائد ورکرز کے اعزاز میں چٹ پٹے ظہرانہ کا اہتمام کیا گیا۔ محسن نقوی نے مزدوروں کے ساتھ ان کی نشستوں پر جا کر ملاقات کی اور ساتھ لنچ بھی کیا مزدوروں نے چیئرمین پی سی بی محسن نقوی کے ساتھ سلفیاں اور تصویریں بنوائیں۔چئیرمین پی سی بی محسن نقوی نے دن رات محنت کر کے سٹیڈیم مکمل کرنے پر ورکرز کا شکریہ ادا کیا شاباش دی اور انہوں نے مزدوروں کو کل 8 فروری کو پاکستان اور نیوزی لینڈ کے درمیان ہونیوالا میچ دیکھنے کی خصوصی دعوت بھی دی چیئرمین پی سی بی نے مزدوروں کو شاندار الفاظ میں خراج تحسین پیش کرتے ہوئے کہا کہ آپ قوم کے ہیرو ہیں۔ سب مبارکباد کے مستحق ہیں۔ مزدوروں نے محسن نقوی کے ویژن کو سراہتے ہوئے کہا کہ جناب نقوی صاحب آپ نے کمال کر دیا۔ ہم سب مزدور 3 ماہ سے قذافی سٹیڈیم میں ہیں۔ اب دلکش سٹیڈیم کو دیکھ کر دل خوش ہو گیا ہے۔ محسن صاحب آپ کی محنت رنگ لائی ہے۔ ہم خود آپ کو سٹیڈیم میں صبح شام دیکھتے ہیں۔ بعض مزدور بیلچہ ساتھ اٹھائے لنچ کرتے رہے اور انہوں نے چیئرمین پی سی بی سے کہا کہ ہم تو لنچ بھی ہم اپنے” ہتھیاروں” کے ساتھ کر رہے ہیں۔

محسن نقوی نے مزدوروں کو مخاطب کرتے ہوئے کہا کہ قذافی سٹیڈیم آپ کا سٹیڈیم ہے۔ قذافی سٹیڈیم کو ریکارڈ مدت میں مکمل کرنے میں آپ کی دن رات کی محنت شامل ہے۔

چٹ پٹے ظہرانہ میں مزدوروں نے مٹن قورمہ، چکن روسٹ، بیف پلاو اور لائیو گرما گرم نان کھائے ،زردہ،رائتہ، فریش سلاد،منرل واٹر ،کولڈ ڈرنکس اور کشمیری چائے سے بھی مزدوروں کی تواضع کی گئی۔

قذافی سٹیڈیم کو دنیا کے جدید ترین میدان میں ڈھالنے والے مزدوروں کے اعزاز میں منعقدہ ظہرانہ میں ایڈوائزر عامر میر۔ چیف آپریٹنگ آفیسر سمیر احمد۔ چیف ایگزیکٹو آفیسر پی ایس ایل سلمان نصیر۔ پاکستان ٹیم کے کپتان محمد رضوان۔ چیف فنانشل آفیسر جاوید مرتضی۔ ایف ڈبلیو او کے پراجیکٹ ڈائریکٹر۔ نیسپاک ۔ پی سی بی کے اعلی حکام بھی اس موقع پر موجود تھے۔