Admin
:محمد ندیم قیصر (ملتان)
:تفصیلات
پریذیڈنٹ کپ گریڈ ون کرکٹ میں پی ٹی وی کی ٹیم فائنل میں پہنچ گئی فائنل عید الفطر کے بعد کھیلا جائے گا ۔ دوسری فائنلسٹ ٹیم کا فیصلہ 9ویں راؤنڈ کے اختتام پر ہو گا ۔ ایونٹ کے 8 راؤنڈ مکمل ہونے پر پوائنٹس ٹیبل کی پوزیشن کے مطابق پاکستان ٹیلی وژن 149 پوائنٹس کے ساتھ ٹاپ پوزیشن پر براجمان ہے۔ سٹیٹ بینک 137 پوائنٹس کے ساتھ دوسرے نمبر پر ہے اور غنی گلاس کی 112 پوائنٹس حاصل کرکے تیسرے نمبر پر ہے۔ اور یہ دونوں ٹیمیں فائنل کھیلنے کی مضبوط امیدوار ہیں لیکن فائنل کس ٹیم نے کھیلنا ہے اس کا حتمی فیصلہ نویں اور آخری راؤنڈ کے اختتام پر ہو سکے گا۔
پریذیڈنٹ ٹرافی گریڈ ون کے 9ویں اور آخری راؤنڈ کے میچز شروع۔ پہلے روز راجہ حمزہ وحید۔ سرور آفریدی اور عابد علی کی سنچریاں۔
پریذیڈنٹ ٹرافی گریڈ ون کے نویں اور آخری راؤنڈ کے پہلے دن کے کھیل کی خاص بات اوجی ڈی سی ایل کے راجہ حمزہ وحید ، سرور آفریدی اور ایس این جی پی ایل کے عابد علی کی سنچریاں اور کے آر ایل کے محمد عرفان کی 7 وکٹوں کی عمدہ کارکردگی تھی۔
میچز کی تفصیلات کے مطابق سٹیٹ بینک سٹیڈیم میں اوجی ڈی سی ایل نے ہائر ایجوکیشن کے خلاف پہلے بیٹنگ کرتے ہوئے 5 وکٹوں پر 361 رنز بنائے تھے۔راجہ حمزہ وحید نے 16 چوکوں اور ایک چھکے کی مدد سے 103 رنز بنائے ۔یہ فرسٹ کلاس کرکٹ میں ان کی پہلی سنچری ہے۔
سرور آفریدی نے بھی تین ہندسوں کی اننگز کھیلی اور15 چوکوں اور 2 چھکوں کی مدد سے 123 رنز اسکور کیے۔منصور علی نے 3 وکٹیں حاصل کیں۔
این بی پی سپورٹس کمپلیکس میں غنی گلاس کی ٹیم واپڈا کے خلاف پہلی اننگز میں 286 رنز بناکر آؤٹ ہوگئی۔ سعد نسیم نے 94 اور شاداب خان نے 70 رنز سکور کیے اور چھٹی وکٹ کی شراکت میں 164 رنز کا اضافہ کیا۔
عاکف جاوید نے 55 رنز دے کر 4 وکٹیں حاصل کیں۔خالد عثمان اور مجتبی خان نے 3 تین وکٹیں حاصل کیں۔
واپڈا نے کھیل ختم ہونے پر 3 وکٹوں پر 18 رنز بنائے تھے۔تینوں وکٹیں خرم شہزاد نے حاصل کیں ۔کے سی سی اے سٹیڈیم میں سٹیٹ بینک کی ٹیم کے آر ایل کے خلاف پہلی اننگز میں 119 رنز بناکر آؤٹ ہوگئی۔محمد فیضان 44 رنز کے ساتھ ٹاپ اسکورر رہے۔ محمد عرفان نے 44 رنز دے کر 7 وکٹیں حاصل کیں۔
کے آر ایل کی ٹیم بھی اپنی پہلی اننگز میں150 رنز بناکر آؤٹ ہوگئی۔مرزا سعد بیگ 44 رنز بناکر ٹاپ سکورر رہے۔ کاشف بھٹی نے 37 رنز دے کر4 وکٹیں حاصل کیں۔ رمیز عزیز نے3 وکٹیں حاصل کیں۔
سٹیٹ بینک نے کھیل ختم ہونے پر اپنی دوسری اننگز میں بغیر کسی نقصان کے 8 رنز بنائے تھے۔
یوبی ایل سپورٹس کمپلیکس میں ایس این جی پی ایل نے ایشال ایسوسی ایٹس کے خلاف 8 وکٹوں پر 270 رنز بنائے تھے ۔
عابدعلی شاندار بیٹنگ کرتے ہوئے26 چوکوں اور ایک چھکے کی مدد سے 173 رنز کے ساتھ ناٹ آؤٹ ہیں ۔ یہ ان کی اس ٹورنامنٹ میں پہلی اور فرسٹ کلاس کرکٹ میں 31 ویں سنچری ہے۔
اسد رضانے 54 رنز دے کر 4 وکٹیں حاصل کیں۔
