اقوام متحدہ کی خصوصی رپورٹ: پہلگام واقعے میں پاکستان ملوث نہیں، بھارت کا آپریشن سندور عالمی قانون کے منافی قرار

رپورٹ۔۔۔ فضہ حسین
اقوام متحدہ کی خصوصی رپورٹ: پہلگام واقعے میں پاکستان ملوث نہیں، بھارت کا آپریشن سندور عالمی قانون کے منافی قرار

اقوام متحدہ کی خصوصی رپورٹ میں مئی 2025 میں ہونے والی پاک بھارت کشیدگی اور عسکری کارروائیوں پر پاکستان کے مؤقف کی واضح تائید کرتے ہوئے بھارت کے اقدامات کو بین الاقوامی قوانین اور اقوام متحدہ کے چارٹر کی صریح خلاف ورزی قرار دیا گیا ہے۔ رپورٹ کے مطابق پہلگام حملے میں پاکستان کے ملوث ہونے کے کوئی قابلِ اعتماد شواہد موجود نہیں جبکہ بھارت کی جانب سے 7 مئی 2025 کو “آپریشن سندور” کے تحت پاکستان کی حدود میں طاقت کا استعمال غیر قانونی تھا۔

اقوام متحدہ کے خصوصی ماہرین نے اپنی رپورٹ میں واضح کیا ہے کہ بھارت نے طاقت کے استعمال سے قبل نہ تو مطلوبہ قانونی طریقۂ کار اختیار کیا اور نہ ہی اقوام متحدہ کی سلامتی کونسل کو اقوام متحدہ چارٹر کے آرٹیکل 51 کے تحت باضابطہ طور پر آگاہ کیا، جو کہ ایک سنگین قانونی کوتاہی ہے۔ رپورٹ میں کہا گیا ہے کہ پیشگی اطلاع نہ دینا اور شفاف وضاحت فراہم نہ کرنا بین الاقوامی قانون کی خلاف ورزی کے زمرے میں آتا ہے۔

رپورٹ کے مطابق بھارتی فضائی اور زمینی حملوں کے دوران شہری علاقوں کو نشانہ بنایا گیا، مساجد کو نقصان پہنچا اور متعدد بے گناہ شہری جاں بحق اور زخمی ہوئے۔ اقوام متحدہ کے ماہرین نے شہری آبادی کے خلاف طاقت کے استعمال پر گہری تشویش کا اظہار کرتے ہوئے کہا کہ ایسے اقدامات انسانی حقوق اور جنگی قوانین دونوں کی خلاف ورزی ہیں۔

خصوصی رپورٹ میں اس امر کی بھی نشاندہی کی گئی ہے کہ پاکستان نے پہلگام حملے میں کسی بھی قسم کی شمولیت کی سختی سے تردید کی اور آغاز ہی سے غیر جانبدار، شفاف اور بین الاقوامی معیار کے مطابق تحقیقات کا مطالبہ کیا۔ رپورٹ کے مطابق بھارت یہ ثابت کرنے میں ناکام رہا کہ پہلگام واقعے میں پاکستان کی ریاستی سطح پر کوئی کردار تھا، جس کے باعث بھارت کے جوابی حملوں کا جواز کمزور پڑ جاتا ہے۔

اقوام متحدہ کے ماہرین نے واضح کیا کہ 7 مئی 2025 کو پاکستان نے بھارتی کارروائی کی مذمت کرتے ہوئے سلامتی کونسل کو باضابطہ طور پر آگاہ کیا کہ وہ اقوام متحدہ چارٹر کے آرٹیکل 51 کے تحت اپنے دفاع کا حق محفوظ رکھتا ہے۔ اس کے برعکس بھارت نے نہ صرف قانونی تقاضے پورے نہیں کیے بلکہ یکطرفہ عسکری اقدام کرکے خطے میں امن کو خطرے میں ڈال دیا۔

رپورٹ میں سندھ طاس معاہدے کے حوالے سے بھی بھارت کے طرزِ عمل پر شدید تحفظات کا اظہار کیا گیا ہے۔ اقوام متحدہ کے خصوصی ماہرین کے مطابق پانی کی فراہمی روکنا یا معاہدے کو معطل کرنا ایک غیر مناسب اور غیر قانونی قدم ہے، کیونکہ اس کا براہِ راست اثر عام پاکستانی شہریوں کے بنیادی انسانی حقوق پر پڑتا ہے۔ رپورٹ میں واضح کیا گیا ہے کہ “کاؤنٹر میژرز” یا جوابی اقدامات انسانی حقوق سے متعلق بین الاقوامی ذمہ داریوں سے استثنیٰ فراہم نہیں کرتے۔

خصوصی ماہرین کے مطابق کسی بھی قسم کے کاؤنٹر میژرز کے لیے قانونی نوٹس، مذاکرات کی پیشکش اور طے شدہ طریقۂ کار کی پابندی لازمی ہے۔ رپورٹ میں کہا گیا ہے کہ ایسے اقدامات عارضی اور قابلِ واپسی ہوتے ہیں، انہیں مستقل بنیادوں پر معاہدے کی معطلی یا خاتمے کے لیے استعمال نہیں کیا جا سکتا۔

اقوام متحدہ کی رپورٹ میں یہ بھی انکشاف کیا گیا ہے کہ سندھ طاس معاہدے کے تحت انڈس کمیشن کے سالانہ اجلاس 2022 کے بعد سے منعقد نہیں ہو سکے، جو معاہدے کی روح کے خلاف ہے۔ اسی طرح پانی سے متعلق ڈیٹا کے تبادلے میں رکاوٹیں، تصفیہ جاتی شقوں پر تنازعات اور ثالثی عمل میں بھارت کی عدم شرکت کو بھی سنگین خلاف ورزی قرار دیا گیا ہے۔ رپورٹ کے مطابق بھارت نے معاہدے کے دائرہ اختیار کو چیلنج کرکے ایک اہم بین الاقوامی معاہدے کو کمزور کرنے کی کوشش کی۔

خصوصی ماہرین نے سفارش کی ہے کہ بھارت سے ان تمام اقدامات پر باضابطہ وضاحت طلب کی جائے، ممکنہ نقصانات کی تلافی اور معذرت پر بھی جواب مانگا جائے اور اس بات کی ضمانت لی جائے کہ سندھ طاس معاہدے پر آئندہ نیک نیتی کے ساتھ عمل درآمد کیا جائے گا۔

رپورٹ میں بھارت پر زور دیا گیا ہے کہ وہ انسانی جانوں کے نقصان کو روکنے کے لیے واضح اور عملی اقدامات کی تفصیل پیش کرے، خاص طور پر پانی کی رکاوٹ کے باعث پیدا ہونے والی انسانی حقوق کی خلاف ورزیوں کو فوری طور پر ختم کیا جائے۔ اقوام متحدہ کے خصوصی ماہرین نے واضح کیا کہ بھارت پاکستان کے آبی اور انسانی حقوق کی خلاف ورزی سے باز رہے اور خطے میں پائیدار امن کے لیے بین الاقوامی قوانین اور معاہدوں کی مکمل پاسداری کرے۔

مجموعی طور پر اقوام متحدہ کی یہ خصوصی رپورٹ نہ صرف پاکستان کے مؤقف کی توثیق کرتی ہے بلکہ بھارت کے عسکری اور آبی اقدامات کو عالمی قانون، انسانی حقوق اور اقوام متحدہ چارٹر کی روشنی میں غیر قانونی اور ناقابلِ جواز قرار دیتی ہے، جو خطے میں امن و استحکام کے لیے ایک اہم سفارتی پیش رفت سمجھی جا رہی ہے۔