آئی ایم ایف کا الیکٹرک گاڑیوں اور بائیکس پر 18 فیصد جی ایس ٹی عائد کرنے کا مطالبہ، مہنگائی میں اضافے کا خدشہ

رپورٹ۔۔۔۔۔ فضہ حسین
آئی ایم ایف کا الیکٹرک گاڑیوں اور بائیکس پر 18 فیصد جی ایس ٹی عائد کرنے کا مطالبہ، مہنگائی میں اضافے کا خدشہ

اسلام آباد: عالمی مالیاتی ادارے (آئی ایم ایف) نے پاکستان سے مطالبہ کیا ہے کہ الیکٹرک گاڑیوں اور الیکٹرک بائیکس پر عائد سیلز ٹیکس میں دی گئی چھوٹ ختم کرتے ہوئے 18 فیصد جنرل سیلز ٹیکس (جی ایس ٹی) نافذ کیا جائے۔ یہ مطالبہ جاری قرض پروگرام کے تحت حکومت پاکستان سے کیے گئے مذاکرات کے دوران سامنے آیا ہے۔ میڈیا رپورٹس کے مطابق آئی ایم ایف کا مؤقف ہے کہ ٹیکس نیٹ کو وسیع کرنے اور حکومتی آمدن بڑھانے کے لیے مختلف شعبوں میں دی گئی ٹیکس چھوٹ ختم کرنا ناگزیر ہو چکا ہے۔
اس وقت پاکستان میں مقامی طور پر تیار کی جانے والی ہائبرڈ الیکٹرک گاڑیوں اور بائیکس کو سیلز ٹیکس کے آٹھویں شیڈول کے تحت جزوی یا مکمل ٹیکس چھوٹ حاصل ہے۔ حکومتی پالیسی کے مطابق مقامی مینوفیکچرڈ ہائبرڈ الیکٹرک وہیکل پر 30 جون 2026ء تک ٹیکس چھوٹ دی گئی ہے، تاہم آئی ایم ایف اس رعایت کو ختم کر کے یکساں ٹیکس نظام نافذ کرنے کا حامی ہے۔ آئی ایم ایف نے واضح طور پر مطالبہ کیا ہے کہ 30 جون 2026ء کے بعد مقامی طور پر تیار ہونے والی الیکٹرک گاڑیوں اور بائیکس کو سیلز ٹیکس کے نارمل رجیم میں شامل کیا جائے اور ان پر 18 فیصد جی ایس ٹی لاگو کیا جائے۔
ذرائع کے مطابق اس وقت 1800 سی سی تک کی مقامی سطح پر تیار ہائبرڈ الیکٹرک گاڑیوں پر 8.5 فیصد سیلز ٹیکس عائد ہے، جبکہ 2500 سی سی تک کی لوکل مینوفیکچرڈ ہائبرڈ گاڑیوں پر 12.75 فیصد سیلز ٹیکس وصول کیا جا رہا ہے۔ آئی ایم ایف کا کہنا ہے کہ یہ کم شرحیں مارکیٹ میں عدم توازن پیدا کر رہی ہیں اور حکومت کو ریونیو میں نمایاں نقصان ہو رہا ہے، اس لیے ان گاڑیوں کو آٹھویں شیڈول سے نکال کر عام ٹیکس نظام کا حصہ بنایا جائے۔
وزارت صنعت و پیداوار کے ساتھ ہونے والی بات چیت میں آئی ایم ایف نے زور دیا کہ مقامی مینوفیکچررز کو دی جانے والی مراعات وقتی بنیادوں پر تھیں، جنہیں اب ختم ہونا چاہیے۔ ادارے کے مطابق الیکٹرک گاڑیوں پر ٹیکس چھوٹ برقرار رکھنے سے ایک طرف حکومتی آمدن متاثر ہو رہی ہے تو دوسری جانب دیگر شعبوں پر ٹیکس کا بوجھ بڑھ رہا ہے، جو معاشی انصاف کے اصولوں کے منافی ہے۔
الیکٹرک گاڑیوں کے علاوہ آئی ایم ایف نے حکومت پاکستان سے دیگر اہم معاشی اصلاحات کا بھی مطالبہ کیا ہے۔ ان شرائط کے تحت حکومت کو گندم کی امدادی قیمت مقرر کرنے پر پابندی لگانے کی تجویز دی گئی ہے، جس سے زرعی شعبے میں قیمتوں کے تعین کا نظام آزاد ہو جائے گا۔ تاہم ماہرین کا کہنا ہے کہ اس فیصلے سے کسانوں کو نقصان پہنچنے اور گندم کی قیمتوں میں اتار چڑھاؤ کا خدشہ بڑھ سکتا ہے۔
اسی طرح آئی ایم ایف نے ہائی ویلیو سرجری آئٹمز اور طبی آلات پر سیلز ٹیکس نافذ کرنے کی بھی سفارش کی ہے۔ اس اقدام سے صحت کے شعبے میں علاج کے اخراجات میں اضافے کا خدشہ ظاہر کیا جا رہا ہے، جس کا براہ راست اثر عام شہریوں پر پڑ سکتا ہے۔ صحت کے ماہرین کا کہنا ہے کہ پہلے ہی مہنگے علاج مزید مہنگے ہونے سے غریب اور متوسط طبقے کے لیے معیاری طبی سہولیات تک رسائی مشکل ہو جائے گی۔
توانائی کے شعبے میں بھی آئی ایم ایف نے اصلاحات پر زور دیا ہے، جن میں ٹیرف ایڈجسٹمنٹ، لاگت میں کمی اور سرکاری اداروں کی کارکردگی بہتر بنانے کے اقدامات شامل ہیں۔ ادارے کے مطابق توانائی کے شعبے میں نقصانات اور گردشی قرضے ملکی معیشت کے لیے ایک بڑا چیلنج بن چکے ہیں، جن پر قابو پانے کے لیے سخت فیصلے ناگزیر ہیں۔
مزید برآں آئی ایم ایف نے حکومت کو ہدایت کی ہے کہ سرکاری ملکیتی اداروں (SOEs) کے قوانین میں تبدیلی کا عمل اگست 2026ء تک مکمل کیا جائے۔ ان اصلاحات کا مقصد ان اداروں کو مالی طور پر خودمختار بنانا اور قومی خزانے پر بوجھ کم کرنا ہے۔ دوسری جانب سماجی تحفظ کے شعبے میں آئی ایم ایف نے کفالت پروگرام کے دائرہ کار کو بڑھانے کی تجویز بھی دی ہے، جس کے تحت مستحق افراد کی تعداد بڑھا کر ایک کروڑ دو لاکھ تک کرنے کا کہا گیا ہے۔
ماہرین معاشیات کا کہنا ہے کہ اگرچہ آئی ایم ایف کی جانب سے تجویز کردہ اقدامات کا مقصد معیشت کو مستحکم کرنا اور حکومتی مالی خسارہ کم کرنا ہے، تاہم ان فیصلوں کا براہ راست اثر عوام کی روزمرہ زندگی پر پڑے گا۔ الیکٹرک گاڑیوں اور بائیکس پر 18 فیصد جی ایس ٹی کے نفاذ سے ان کی قیمتوں میں نمایاں اضافہ متوقع ہے، جس سے ماحول دوست ٹرانسپورٹ کے فروغ کو بھی دھچکا لگ سکتا ہے۔
مجموعی طور پر آئی ایم ایف کی شرائط کے تحت مجوزہ نئے ٹیکسز اور اصلاحات سے مہنگائی میں اضافے کا خدشہ ہے، جس پر عوامی حلقوں میں تشویش پائی جا رہی ہے۔ اب دیکھنا یہ ہے کہ حکومت ان مطالبات پر کس حد تک عمل درآمد کرتی ہے اور عوام کو ممکنہ معاشی دباؤ سے بچانے کے لیے کیا حکمت عملی اپناتی ہے۔