2025 میں معاشی زوال، بے روزگاری میں تشویشناک اضافہ، پی ٹی آئی کے 8 فروری احتجاج پر رانا ثناء اللہ کے سخت تحفظات

رپورٹ۔۔۔۔۔۔ فضہ حسین
2025 میں معاشی زوال، بے روزگاری میں تشویشناک اضافہ، پی ٹی آئی کے 8 فروری احتجاج پر رانا ثناء اللہ کے سخت تحفظات

سال 2025 کے دوران ملک میں معاشی صورتحال بدترین زوال کا شکار رہی، جس کے نتیجے میں لاتعداد صنعتیں اور کاروبار بند ہو گئے اور بے روزگاری میں ہولناک اضافہ دیکھنے میں آیا۔ تاجر برادری نے حکومت کی کارکردگی پر سخت سوالات اٹھاتے ہوئے اسے ایک باقاعدہ ’’چارج شیٹ‘‘ قرار دیا ہے۔ تاجروں کا کہنا ہے کہ حکمرانوں کی غفلت اور ناقص معاشی پالیسیوں نے کاروباری طبقے کو شدید نقصان پہنچایا، جس کا براہِ راست اثر عام آدمی کی روزمرہ زندگی پر پڑا۔
تاجر تنظیموں کے مطابق حکومت نے بیرونی سرمایہ کاری کے نام پر 35 سے زائد غیرملکی دورے کیے، تاہم ان دوروں کا عملی فائدہ سامنے نہ آ سکا۔ ایک بھی قابلِ ذکر سرمایہ کاری ملک میں نہیں آئی، بلکہ اس کے برعکس مقامی سرمایہ بھی عدم استحکام اور غیر یقینی صورتحال کے باعث بیرونِ ملک منتقل ہوتا رہا۔ تاجروں کا کہنا ہے کہ اگر یہی صورتحال برقرار رہی تو صنعتی پہیہ مکمل طور پر جام ہونے کا خدشہ ہے، جس کی ذمہ داری براہِ راست موجودہ حکومتی پالیسیوں پر عائد ہوتی ہے۔
دوسری جانب وفاقی مشیر برائے سیاسی امور سینیٹر رانا ثناء اللہ نے پاکستان تحریکِ انصاف (پی ٹی آئی) کے 8 فروری کو احتجاج کے اعلان کو غیر مناسب قرار دیتے ہوئے کہا ہے کہ اس فیصلے سے سیاسی کشیدگی میں مزید اضافہ ہوگا۔ انہوں نے واضح کیا کہ اس تاریخ تک بانی پی ٹی آئی عمران خان سے ملاقاتیں بھی ممکن نہیں ہوں گی۔ رانا ثناء اللہ کے مطابق عمران خان ایک اور 26 نومبر جیسے احتجاج کی منصوبہ بندی کر رہے تھے، اسی وجہ سے ملاقاتوں پر قدغن لگائی گئی۔
سما نیوز کے ایک پروگرام میں گفتگو کرتے ہوئے رانا ثناء اللہ نے کہا کہ ملک کو درپیش سنگین مسائل کا حل صرف سیاسی جماعتوں کے باہمی مذاکرات میں ہے۔ ان کا کہنا تھا کہ سیاستدانوں کو ذاتی مفادات سے بالاتر ہو کر قومی مفاد میں بیٹھ کر بات چیت کرنی چاہیے، جبکہ میڈیا کو بھی اس عمل میں مثبت اور ذمہ دارانہ کردار ادا کرنا ہوگا۔ انہوں نے کہا کہ اگر کوئی فریق مذاکرات سے انکار کرتا ہے تو اس کی نشاندہی ہونی چاہیے تاکہ عوام کو اصل صورتحال سے آگاہی حاصل ہو۔
رانا ثناء اللہ نے اس تاثر کو بھی مسترد کیا کہ ان کی یا عمیر نیازی کی سطح پر ہونے والے مذاکرات سے کوئی بامقصد نتیجہ نکل سکتا ہے۔ ان کا کہنا تھا کہ حقیقی اور مؤثر مذاکرات اسی وقت ممکن ہیں جب ملک کی تین بڑی سیاسی شخصیات، یعنی نواز شریف، عمران خان اور آصف علی زرداری خود اس پر آمادہ ہوں۔ ان کے بقول، سیاسی بحران کا حل نچلی سطح کے مذاکرات میں نہیں بلکہ قیادت کی سنجیدہ اور مخلصانہ کوششوں میں پوشیدہ ہے۔
انہوں نے اس بات پر بھی زور دیا کہ اسٹیبلشمنٹ، چاہے جیل میں ہو یا باہر، مذاکرات کی میز پر نہیں بیٹھ سکتی۔ آئین اور قانون اس بات کی اجازت نہیں دیتے کہ اسٹیبلشمنٹ براہِ راست سیاسی مذاکرات کا حصہ بنے۔ تاہم ان کا کہنا تھا کہ جب بھی سیاسی بات چیت ہو، تو اسٹیبلشمنٹ اور ریاستی اداروں کا اعتماد حاصل ہونا ضروری ہے تاکہ کسی بھی فیصلے پر مؤثر عملدرآمد ممکن ہو سکے۔
رانا ثناء اللہ نے سیاسی ماحول میں بڑھتی ہوئی تلخی پر بھی تشویش کا اظہار کیا۔ ان کے مطابق سیاسی قیادت کے درمیان تلخی کا وہ سلسلہ جو 2011 میں مینارِ پاکستان کے جلسے سے شروع ہوا تھا، آج تک ختم نہیں ہو سکا۔ انہوں نے کہا کہ ان تینوں بڑے رہنماؤں میں صرف عمران خان ہیں جو گالیوں اور سخت زبان کا استعمال کرتے ہیں، جبکہ نہ نواز شریف اور نہ ہی آصف علی زرداری کو کبھی اس طرح کی زبان استعمال کرتے ہوئے سنا گیا ہے۔
وفاقی مشیر نے مزید کہا کہ عمران خان نے عظمیٰ خان سے ملاقات کے دوران اسٹریٹ موومنٹ کا پیغام دیا، اور اگر ملاقاتیں نہ ہوں تو آئندہ کی حکمتِ عملی کو روکا جا سکتا ہے۔ ان کے بقول بانی پی ٹی آئی کا مؤقف ہے کہ کوئی مذاکرات نہیں ہوں گے اور جو بھی مذاکرات کرے گا، وہ پارٹی کا حصہ نہیں رہے گا۔ رانا ثناء اللہ نے خبردار کیا کہ اگر کوئی پہیہ جام کرنے یا ریاستی نظام کو مفلوج کرنے کی کوشش کرے گا تو قانون کے مطابق کارروائی کی جائے گی۔
انہوں نے پی ٹی آئی کے سوشل میڈیا رویے پر بھی سخت تنقید کی اور کہا کہ دفاعی اداروں اور ان کی قیادت کے خلاف منظم مہم جوئی کی جا رہی ہے۔ ان کا کہنا تھا کہ جب تک اس قسم کی مہمات بند نہیں ہوتیں، سیاسی استحکام اور آگے بڑھنے کی کوئی راہ ہموار نہیں ہو سکتی۔ رانا ثناء اللہ کے مطابق ملک کو اس وقت اشتعال انگیزی نہیں بلکہ تحمل، سنجیدگی اور بامقصد مکالمے کی ضرورت ہے، تاکہ سیاسی اور معاشی بحران سے نکلنے کی کوئی سبیل پیدا کی جا سکے۔