Admin
محمد ندیم قیصر (ملتان)
تفصیلات
پی ایس ایل کے 10 برس مکمل ہو گئے اور آج شام کو “ایکس” ایڈیشن کا راولپنڈی سٹیڈیم میں رنگارنگ تقریب سے آغاز ہونیوالا ہے۔ تین بار کی چیمپئن اسلام آباد یونائیٹڈ اور دو بار ٹائٹل فاتح لاہور قلندر مدمقابل
پاکستان کے سپورٹس فینز کی توجہ کا مرکز ایچ بی ایل پی ایس ایل 10 کا آج 11 اپریل 2025ء کو راولپنڈی کرکٹ سٹیڈیم میں ایک رنگارنگ تقریب سے آغاز ہوگا ۔
اس بار ایچ بی ایل پی ایس ایل کی خاص بات یہ ہے کہ یہ ایک دہائی پر محیط اپنا سفر مکمل کررہی ہے۔
ایچ بی ایل پی ایس ایل10 کے میچز ملتان سٹیڈیم
قذافی سٹیڈیم لاہور ۔ راولپنڈی سٹیڈیم راولپنڈی اور نیشنل بینک سٹیڈیم کراچی میں بھی کھیلے جائیں گے۔ قذافی سٹیڈیم لاہور 18 مئی کو ہونے والے فائنل کی میزبانی کرے گا۔
۔۔۔۔۔۔۔۔۔۔۔۔۔
رنگا رنگ افتتاحی تقریب میں میوزک کا تڑکا۔ اسلام آباد یونائیٹڈ تین بار کی اکلوتی چیمپئن فرنچائز
۔۔۔۔۔۔۔۔۔۔۔۔۔۔۔
راولپنڈی کرکٹ سٹیڈیم میں ہونے والی افتتاحی تقریب میں ملک کے مشہور فنکار اپنے فن کا مظاہرہ کرینگے جن میں عابدہ پروین ۔علی ظفر ۔ابرار الحق۔ نتاشہ بیگ ۔ طلحہ انجم اور ینگ اسٹنرز شامل ہیں ۔اس موقع پر شائقین کی دلچسپی کے لیے آتشبازی کا خوبصورت مظاہرہ بھی ہوگا۔ ایچ بی ایل پی ایس ایل کا افتتاحی میچ رات ساڑھے آٹھ بجے دفاعی چیمپئن اسلام آباد یونائٹڈ اور لاہور قلندرز کے درمیان کھیلا جائے گا۔ اسلام آباد یونائٹڈ واحد ٹیم ہے جس نے ایچ بی ایل پی ایس ایل تین مرتبہ ( 2016 ۔ 2018 ۔ 2024 ۔ ) جیتی ہے
لاہور قلندرز نے دو مرتبہ ( 2022۔ 2023۔ ) ٹائٹل جیتا ہے۔
اسلام آباد یونائٹڈ کی قیادت شاداب خان کرینگے لاہور قلندرز شاہین شاہ آفریدی کی قیادت میں میدان میں اترے گی۔دونوں ٹیموں کو تجربہ کار ملکی اور غیرملکی کھلاڑیوں کی خدمات حاصل ہیں۔اسلام آباد یونائٹڈ نے اب تک پی ایس ایل میں مجموعی طور پر 100 میچز کھیلے ہیں جن میں سے55 جیتے ہیں اور44 میں اسے شکست ہوئی ہے ایک میچ ٹائی ہوا ہے۔
لاہور قلندرز نے 94میں سے 40 میچوں میں کامیابی حاصل کی ہے جبکہ 51 میں اسے شکست ہوئی ہے اور 3 میچز ٹائی ہوئے ہیں۔
۔۔۔۔۔۔۔۔۔۔۔۔۔
پی ایس ایل ایکس میں
پلیئر ٹریکنگ ٹیکنالوجی کا متعارف۔کمنٹری باکس کیلئے بڑے ناموں کا انتخاب
۔۔۔۔۔۔۔۔۔۔
ناظرین اس پی ایس ایل میں 32 کیمروں اور جدید ٹیکنالوجی کے ساتھ کوریج کے اعلی معیار سے لطف اندوز ہوسکیں گے اور یہ ایونٹ مختلف چینلز اور ڈیجیٹل پلیٹ فارمز کے ذریعے دنیا بھر میں دیکھا جاسکے گا۔
ایچ بی ایل پی ایس ایل10 میں کرکٹ کے دنیا کے کئی بڑے نام کمنٹری میں نظر آئیں گے جن میں انگلینڈ کے سابق کپتان سر الیسٹر کک اور ایم سی سی کے سابق صدر مارک نکولس کے نام قابل ذکر ہیں۔ایچ بی ایل پی ایس ایل میں شائقین کی دلچسپی کے لیے مختلف اقدامات کیے گئے ہیں جن میں پہلی مرتبہ ہر میچ میں مکمل اردو کمنٹری ، میچوں کے دوران ریفل ٹکٹ کے ذریعے انعامات اور نئی جدت کے ساتھ پلیئر ٹریکنگ ٹیکنالوجی کا متعارف کرایا جانا شامل ہے۔
۔۔۔۔۔۔۔۔۔۔
سلطان کے محمد رضوان بھی پی ایس ایل فینز میں شامل۔ دفاعی چیمپئن یونائیٹڈ کے بھی بلند ارادے
۔۔۔۔۔۔۔۔۔۔۔۔۔۔۔۔
سلطان ز کے محمد رضوان بھی پی ایس ایل فینز میں شامل ہو چکے ہیں تو دوسری جانب دسویں ایکس ایڈیشن کی دفاعی چیمپئن فرنچائز یونائیٹڈ کے ارادے بھی آسمان کو چھو رہے ہیں
پاکستان سپر لیگ کے سیزن ایکس یعنی دسویں ایڈیشن
کی دفاعی چیمپئن اسلام آباد یونائیٹڈ کے کپتان شاداب خان کا کہنا ہے کہ اسلام آباد یونائیٹڈ اپنے شائقین کے سامنے اچھی کارکردگی دکھانے کے لیے پرجوش ہے۔ آپ کو اس سیزن میں اسلام آباد یونائیٹڈ کا ایک مختلف روپ دیکھنے کو ملے گا۔دفاعی چیمپئن ہونے کے ناتے ہم اس سیزن میں بھی مستقل مزاج کارکردگی کو جاری رکھنے کی کوشش کرینگے۔
ملتان سلطانز کے کپتان محمد رضوان کا کہنا ہے کہ ایچ بی ایل پی ایس ایل ایک بہت بڑا برانڈ بن چکی ہے کہ ملک کے ہر خاندان میں مختلف ٹیموں کے سپورٹرز ہیں شائقین اس لیگ کا پورا سال انتظار کرتے ہیں۔ جو بھی ٹورنامنٹ جیتے گا وہ اس ملک کے لیے کامیاب ہوگا۔
۔۔۔۔۔۔۔۔۔۔۔۔۔۔۔
گلیڈی ایٹرز قلندرز کے معیاری سکواڈز شائقین کے دل جیتنے کیلئے پر عزم۔
۔۔۔۔۔۔۔۔۔۔۔۔۔
کوئٹہ گلیڈی ایٹرز کے کپتان سعود شکیل کا کہنا ہے کہ پچھلے چند سیزن کوئٹہ کے لیے اچھے نہیں رہے اور دیگر تمام ٹیموں کی طرح ہم نے بھی معیاری سکواڈ کو جمع کرنے کی پوری کوشش کی ہے ۔ ہم اس بار اچھا کھیلنے اور شائقین کی تفریح کے لیے پر امید ہیں۔
لاہور قلندرز کے کپتان شاہین شاہ آفریدی کا کہنا ہے کہ پی ایس ایل میں لاہور قلندرز کا ایک اہم مقصد باصلاحیت کھلاڑیوں کی تیاری اور انہیں کھیلنے کا بہترین ماحول فراہم کرنا ہے اور ہم لیگ کے 10ویں ایڈیشن میں بھی اس مقصد پر قائم رہیں گے۔ امید ہے کہ ہماری ٹیم اس سیزن میں اچھی کارکردگی کا مظاہرہ کرے گی۔
۔۔۔۔۔۔۔۔۔
زلمی کا بیٹنگ بولنگ کامبی نیشن پر انحصار۔ کنگز کا “فائر پاور” پلان سنسنی پھیلائے گا
۔۔۔۔۔۔۔۔۔۔۔۔۔۔۔۔
پشاور زلمی کے کپتان بابراعظم کا کہنا ہے کہ اس سیزن میں ہم اس بات پر توجہ مرکوز کر رہے ہیں کہ ہم نے پچھلے دو ایڈیشن میں کیا کھویا اور انہی غلطیوں کو نہ دہرایا جائے۔ ہم نے بولنگ اور بیٹنگ دونوں شعبوں میں اپنا مرکز مضبوط کیا ہے تاکہ ہم کھیل کے کسی بھی مرحلے پر جدوجہد نہ کریں۔
کراچی کنگز کے نائب کپتان حسن علی کا کہنا ہے کہ کراچی کنگز نے اپنی بیٹنگ میں فائر پاور لانے کے لیے اپنا کامبی نیشن تبدیل کیا ہے اور ہم ابتدا ہی سے جارحانہ انداز میں کھیلنے کا ارادہ رکھتے ہیں کیونکہ پاور پلے آپ کے جیتنے کے امکانات کو بڑھاتا ہے۔
