Admin
:محمد ندیم قیصر (ملتان)
:تفصیلات
ایچ بی ایل پی ایس ایل سیزن ایکس میں زلمی نے سلطانز کے مقدر میں 8 ویں شکست لکھ دی۔ پشاور نے ملتان کو ان کے گھر کے کرکٹ میدان پر پچھاڑتے ہوئے پلے آف راؤنڈ تک رسائی کا راستہ روشن بنا دیا۔ملتان سٹیڈیم پر کھیلے گئے میچ میں سلطانز الیون میں 7 تبدیلیاں بھی شکستوں کے طویل سلسلہ کو فتح کے ٹریک پر نہ لا سکیں اوربیٹ بال کے معرکہ میں جب پشاور نے ملتان کے خلاف فتح کا نقارہ بجایا تو اس وقت 7 وکٹیں باقی تھیں۔ملتان سلطانز کی 9 میچوں میں یہ 8 ویں شکست ہے۔ پشاور زلمی نے 8 میچوں میں چوتھا میچ جیتا ہے اور اب اس کے 8 پوائنٹس ہوگئے ہیں اس طرح اس نے پلے آف تک رسائی کی امید کو زندہ رکھا ہوا ہے۔
رضوان الیون میں سات تبدیلیوں کا ریکارڈ۔ لیکن شکستوں کا سلسلہ نہ تھم سکا۔
بابر الیون کے خلاف ایچ بی ایل پی ایس ایل میچ کیلئے رضوان الیون میں سات تبدیلیوں کا ریکارڈ بن گیا۔ لیکن شکستوں کا سلسلہ نہ تھم سکا۔ملتان سلطانز سات تبدیلیوں کے ساتھ میدان میں اتری۔ عثمان خان ۔کامران غلام ۔کرٹس کیمفر۔افتخار احمد ۔ مائیکل بریسویل ۔کرس جارڈن اور اسامہ میر کی جگہ شائی ہوپ ۔ طیب طاہر۔ عامر برکی۔ ایشٹن ٹرنر۔شاہد عزیز۔ فیصل اکرم اور محمد حسنین کو ٹیم میں شامل کیا گیا۔ملتان سلطانز نے ٹاس جیت کر پہلے بیٹنگ کا فیصلہ کیا لیکن وہ 19 اعشاریہ ایک اوورز میں صرف 108 رنز بناکر آؤٹ ہوگئی۔پشاور زلمی نے 109 رنز کا ہدف 13 اوورز میں 3 وکٹوں کے نقصان پر حاصل کرلیا۔ملتان سلطانز کی اننگز میں وکٹیں وقفے وقفے سے گرتی رہیں جس کی وجہ سے وہ ایک بڑے سکور تک پہنچنے میں کامیاب نہ ہوسکی۔کپتان محمد رضوان 17 یاسر خان 10 ۔ طیب طاہر 22 ایشٹن ٹرنر صفر عامر برکی 3 اور شاہد عزیز ایک رن پر آؤٹ ہوئے تو ملتان سلطانز کا اسکور 13 ویں اوور میں 6 وکٹوں پر صرف 66 رنز تھا ۔شائی ہوپ 23رنز بناکر ٹاپ سکورر رہے لیکن یہ اننگز بھی ملتان سلطانز کے کام نہ آسکی۔
زلمی کے آزمائے گئے تمام چھ باؤلرز وکٹ ٹیکر رہے۔ دانیال عزیز 3 وکٹوں کے ساتھ مین آف دی میچ قرار۔
زلمی کے آزمائے گئے تمام چھ باؤلرز وکٹ ٹیکر رہے۔ دانیال عزیز 3 وکٹوں کے ساتھ مین آف دی میچ قرارپائے۔پشاور زلمی کے تمام چھ باؤلرز وکٹ لینے میں کامیاب رہے جن میں احمد دانیال 17 رنز کے عوض3 وکٹوں کے ساتھ نمایاں رہے ان کے تین کیچز اس کے علاوہ تھے۔ معاذ صداقت اور لیوک ووڈ نے دو دو کھلاڑی آؤٹ کیے۔پشاور زلمی نے ڈیوڈ ولی کے اننگز کے پہلے ہی اوور میں مچل اوون کی ایک رن پر وکٹ گنوائی ۔ اگلے ہی اوور میں محمد حسنین کو بھی وکٹ مل جاتی لیکن شائی ہوپ نے صائم ایوب کا 7 رنز پر کیچ ڈراپ کردیا جس کا فائدہ اٹھاتے ہوئے وہ 49 رنز کی اننگز کھیلنے میں کامیاب ہوگئے جس میں4 چوکے اور 3 چھکے شامل تھے۔ان کی وکٹ نوجوان فاسٹ باؤلر شاہد عزیز نے حاصل کی جو اس سے پہلے بابراعظم کو صرف 8 رنز پر کلین بولڈ کرچکے تھے۔میکس برائنٹ کے ایک چھکے اور 5 چوکوں کی مدد سے بنائے گئے 38 رنزناٹ آؤٹ کی وجہ سے زلمی کے لیے ہدف تک پہنچنا آسان ہوگیا۔ملتان سلطانز اپنا 10 واں اور آخری میچ 11 مئی کو کوئٹہ گلیڈی ایٹرز کے خلاف ملتان کرکٹ سٹیڈیم میں کھیلے گی۔
