Admin
محمد ندیم قیصر (ملتان)
:تفصیلات
ویسٹ انڈیز اور پاکستان شاہینز کے درمیان اسلام آباد میں کھیلا گیا سہ روزہ وارم اپ میچ ڈرا ہوگیا۔ مہمان ٹیم کا ٹیسٹ سیریز کیلئے اگلا پڑاؤ ملتان میں ہو گا۔ جو 17 جنوری سے 29 جنوری تک کھیلی جائے گی۔سہ روہ میچ کی تفصیلات کے مطابق اسلام آباد کلب میں جب تیسرے دن میچ ڈرا ہونے کا اعلان کیا گیا تو اس وقت پاکستان شاہینز نے 312 رنز کے ہدف کے تعاقب میں 2 وکٹوں کے نقصان پر 128 رنز بنائے تھے۔
محمد ہریرہ نے ٹیسٹ سیریز سے پہلے اپنی فارم ثابت کردی۔
تیسرے دن کے کھیل کی خاص بات محمد ہریرہ کی شاندار بیٹنگ تھی جنہوں نے12 چوکوں اور 2 چھکوں کی مدد سے80 رنز کی شاندار اننگز کھیلی۔محمد ہریرہ جنہیں ویسٹ انڈیز کے خلاف ٹیسٹ سکواڈ میں شامل کیا گیا ہے اس میچ کی پہلی اننگز میں بھی عمدگی سے بیٹنگ کرتے ہوئے 74 رنز اسکور کیے تھے۔محمد ہریرہ نے عمیر بن یوسف کے ساتھ پہلی وکٹ کی شراکت میں 82 رنز کااضافہ کیا۔ عمیر نے25 رنز سکور کیے۔ویسٹ انڈیز کے ٹاپ وکٹ ٹیکر جومل واریکن نے دو آؤٹ کیے۔
ویسٹ انڈیز کی پہلی اننگز میں نروس نائنٹیز الیک اناتھاز کی دوسری اننگز میں بھی ففٹی
اس سے قبل ویسٹ انڈیز نے اپنی دوسری اننگز 40 اوورز کی بیٹنگ میں 5 وکٹوں پر 177 رنز بناکر ڈیکلیئر کردی تھی۔ پہلی اننگز میں 99 رنز سکور کرنے والے الیک اناتھاز 7 چوکوں اور 2 چھکوں کی مدد سے58 رنز ناٹ آؤٹ کے ساتھ نمایاں رہے۔ٹیون املاچ نے 9 چوکوں کی مدد سے57 رنز سکور کیے اور وہ بھی آؤٹ نہیں ہوئے۔ ان دونوں نے چھٹی وکٹ کی ناقابل شکست شراکت میں 104 رنز کا اضافہ کیا۔ کیون ہوج نے 36 رنز کی اننگز کھیلی۔
شاہینز کی باؤلنگ میں موسیٰ خان اور علی رضا نے دو دو وکٹیں حاصل کیں۔ ویسٹ انڈیز نے پہلی اننگز میں 8 وکٹوں پر346 رنز بنائے تھے پاکستان شاہینز نے اپنی پہلی اننگز میں 9 وکٹوں پر 212 رنز بنائے تھے۔
ویسٹ انڈین ٹیم کا اگلا پڑاؤ ملتان میں
ویسٹ انڈین کرکٹ ٹیم کا اگلا پڑاؤ ملتان میں ہوگا جہاں وہ پاکستان کے خلاف ٹیسٹ سیریز کے دونوں میچز کھیلے گی ۔ پہلا ٹیسٹ میچ 17 جنوری سے شروع ہو گا اور دوسرے ٹیسٹ میچ میں پاک ویسٹ انڈیز ٹیمیں 25 جنوری سے مدمقابل ہوں گی۔ٹیسٹ سیریز میں حصہ لینے کیلئے دونوں ٹیمیں آج 13 جنوری کو ملتان پہنچیں گی اور ہوٹل میں آرام کریں گی کل 14 جنوری سے نیٹ پریکٹس کیلئے ملتان سٹیڈیم جائیں گی۔
