: محمد ندیم قیصر (ملتان)
: تفصیلات
پاک جنوبی افریقہ ویمنز ون ڈے انٹرنیشنل سیریز شروع: سدرہ امین کی سنچری اور منیبہ علی کی ففٹی اننگز پاکستان کی فتح کیلئے ناکافی٬ ماریزان کیپ ، تیزمین برٹس کی سنچریوں نے افریقہ کی کامیابی کا سفر آسان بنا دیا۔جنوبی افریقہ ویمنز نے پاکستان ویمنز کو پہلے ون ڈے انٹرنیشنل میں 8 وکٹوں سے شکست دے کر تین میچوں کی سیریز میں ایک صفر کی برتری حاصل کرلی۔
بیسٹ آف تھری ون ڈے انٹرنیشنل میچز پر مشتمل سیریز کی خاص بات جنوبی افریقہ کی ماریزان کیپ اور تیزمین برٹس کے علاوہ پہلے بیٹنگ کرنے والی پاکستانی ٹیم ٹاپ آرڈر بیٹرکی سدرہ امین شاندار سنچری اور اوپننگ بیٹر منیبہ علی کی بہترین 70پلس ففٹی اننگز تھی۔
قذافی سٹیڈیم لاہور میں منگل کو کھیلے گئے پہلے ڈے اینڈ نائٹ ون ڈے انٹرنیشنل کا ٹاس پاکستان نے جیتا اور پہلے بیٹنگ کرتے ہوئے مقررہ 50 اوورز میں 4 وکٹوں پر255 رنز بنائے۔جنوبی افریقہ نے 48 اعشاریہ دو اوورز میں دو وکٹوں کے نقصان پر ہدف حاصل کرلیا۔
پاکستان کی اننگز کی تفصیلات کے مطابق پہلے بیٹنگ میں پاکستان کو اننگز کے دوسرے ہی اوور میں نقصان اٹھانا پڑا جب شوال ذوالفقار بغیر کوئی رن بنائے آؤٹ ہوگئیں جس کے بعد منیبہ علی اور سدرہ امین نے دوسری وکٹ کی شراکت میں 147 رنز کا اضافہ کیا جو ون ڈے انٹرنیشنل میں پاکستان ویمنز کی دوسری وکٹ کی ریکارڈ شراکت ہے۔اس سے قبل یہ ریکارڈ 143 رنز کا تھا جس میں سدرہ امین اور بسمہ معروف شریک تھیں۔منیبہ علی نے اپنے 50 ویں ون ڈے انٹرنیشنل میں پانچویں نصف سنچری سکور کرتے ہوئے 11 چوکوں کی مدد سے 76 رنز بنائے۔سدرہ امین نے 150 گیندوں پر 12 چوکوں کی مدد سے121 رنز سکور کیے اور وہ آؤٹ نہیں ہوئیں ۔ یہ ان کی ون ڈے انٹرنیشنل میں 5 ویں سنچری ہے۔ انہوں نے ون ڈے انٹرنیشنل میں اپنے دو ہزار رنز بھی مکمل کرلیے۔ وہ بسمہ معروف اور جویریہ خان کے بعد یہ اعزاز حاصل کرنے والی پاکستان کی تیسری بیٹر ہیں۔عالیہ ریاض نے 5 چوکوں کی مدد سے 33 رنز کی اننگز کھیلی اور سدرہ امین کے ساتھ تیسری وکٹ کی شراکت میں 68 رنز کا اضافہ کیا۔کپتان فاطمہ ثنا 3 رنز بناکر آؤٹ ہوئیں۔ نتالیہ پرویز5 رنز پر ناٹ آؤٹ رہیں۔جنوبی افریقہ کی طرف سے آیابونگا کھاکا نے دو وکٹیں حاصل کیں۔
جنوبی افریقہ کی اننگز میں کپتان وولوارٹ 4 رنز بناکر سعدیہ اقبال کی گیند پر کلین بولڈ ہوگئیں۔ سونے لوز کو 30 رنز پر رامین شمیم نے آؤٹ کردیا جس کے بعد تیزمین برٹس اور ماریزان کیپ نے تیسری وکٹ کیلئے شاندار ڈبل سنچری (216 رنز) کی شراکت قائم کرکے اپنی ٹیم کی جیت کو ممکن بنادیا۔یہ جنوبی افریقہ کی تیسری وکٹ کی ریکارڈ شراکت بھی ہے۔برٹس 9 چوکوں کی مدد سے 101 رنز بناکر ناٹ آؤٹ رہیں۔ یہ ان کی پانچویں سنچری ہے۔
کیپ نے 13 چوکوں اور 2 چھکوں کی مدد سے کریئر بیسٹ 121 رنز سکور کیے اور آؤٹ نہیں ہوئیں۔یہ ان کی چوتھی سنچری ہے
دریں اثناء پاکستان اور جنوبی افریقہ کی ویمنز ٹیموں کے مابین تین میچز کی ون ڈے انٹرنیشنل سیریز کے اگلے دونوں میچز بھی قذافی سٹیڈیم لاہور پر شیڈولڈ ہیں ٬ سیریز کا دوسرا ون ڈے انٹرنیشنل 19ستمبر کو کھیلا جائے گا٬سیریز کے تیسرےاور آخری ون ڈے انٹرنیشنل میچ میں پاک جنوبی 22 ستمبر کو مدمقابل ہوں گی۔
