: محمد ندیم قیصر (ملتان)
: تفصیلات
روٹھے سندور کا روکھا پن آئی سی سی ویمنز ورلڈ کپ میں بھی برقرار ٬ ہینڈ شیک کے بغیر میچ میں بھارت نے پاکستان کے خلاف کامیابی اپنے نام کر لی٬ پاکستانی باؤلر ڈیانا بیگ نے انٹرنیشنل کرکٹ میں اپنی وکٹوں کی سنچری مکمل کر لی٬آئی سی سی ویمنز ورلڈ کپ کے اہم میچ میں بھارت نے سری لنکا کے شہر کولمبو کے میدان پر پاکستان کو 88 رنز سے شکست دے دی۔اس سے قبل پہلے میچ میں بنگلہ دیش ویمنز نے پاکستان ویمنز کو 7 وکٹوں سے ہرایا تھا۔
پریماداسا سٹیڈیم میں کھیلے گئے میچ میں پاکستان نے ٹاس جیت کر انڈیا کو پہلے بیٹنگ دی٫ بھارتی ٹیم 50 اوورز میں 247 رنز بناکر آؤٹ ہوگئی۔
جواب میں پاکستان ویمنز ٹیم 43 اوورز میں 159 رنز بناپائی٬ بھارتی اننگز میں سمرتی مندھانا 23 رنز بناکر فاطمہ ثنا کی گیند پر ایل بی ڈبلیو ہوئیں ۔ پراتیکا راول ک31 رنز پر سعدیہ اقبال نے کلین بولڈ کیا۔پاکستان کو تیسری اہم کامیابی اس وقت حاصل ہوئی جب ڈیانا بیگ نے کپتان ہرمنپریت کور کو19 کے انفرادی سکور پر وکٹ کیپر سدرہ نواز کے ہاتھوں کیچ کرادیا۔اس وقت بھارت کا سکور106 رنز تھا۔
ڈیانا بیگ نے جمائما راڈریگز کو بھی سدرہ نواز کے ہاتھوں کیچ کرادیا تھا لیکن وہ نوبال ہوگئی۔وہ پانچ چوکوں کی مدد سے 32 رنز بناکر نشرہ سندھو کی گیند پر ایل بی ڈبلیو ہوئیں۔ہرلین دیول چار چوکوں اور ایک چھکے کی مدد سے46 رنز بناکر رامین شمیم کی گیند پر نشرہ سندھو کے ہاتھوں کیچ ہوگئیں۔ پاکستان کو چھٹی کامیابی 201 کے سکور پر ملی جب فاطمہ ثنا نے سنیھ رانا کو20 کے انفرادی سکور پر عالیہ ریاض کے ہاتھوں کیچ کرادیا۔دیپتی شرما 25 رنز بناکر ڈیانا بیگ کی گیند پر سدرہ نواز کے ہاتھوں کیچ ہوئیں تو مجموعی سکور 203 رنز تھا تاہم ریچا گھوش کے دو چھکوں اور تین چوکوں کی مدد سے 35 رنز ناٹ آؤٹ کی بدولت انڈیا کی ٹیم 247 رنز تک پہنچنے میں کامیاب ہوگئی اور پاکستانی باؤلرز نے پہلی بار بھارتی ٹیم کو کسی بھی ون ڈے انٹر نیشنل میچ میں آل آؤٹ کیا۔
پاکستان کی میڈیم فاسٹ باؤلر ڈیانا بیگ نے چار بھارتی وکٹیں اڑانے کے ساتھ بین الاقوامی کرکٹ میں وکٹوں کی سنچری بھی مکمل کر لی
پاکستان کی طرف سے ٹاپ وکٹ ٹیکر ڈیانا بیگ نے 69 رنز دے کر4 وکٹیں حاصل کیں۔انہوں نے ون ڈے انٹر نیشنل اور ٹی ٹوئنٹی انٹرنیشنل میں مجموعی طور پر سو وکٹیں بھی مکمل کرلیں۔ 30 سالہ ڈیانا بیگ پاکستان کی میڈیم فاسٹ باؤلر ہیں اور گلگت بلتستان کی اسماعیلی مسلم فیملی سے تعلق رکھتی ہیں انہوں نے پاکستان کی ٹیم کو جوائن کرنے سے قبل ہائر ایجوکیشن کمیشن سمیت مختلف ٹیموں کی طرف سے پاکستان کیلئے ڈومیسٹک کرکٹ کھیلی ہے
پاک بھارت میچ کی مزید تفصیلات کے مطابق پاکستانی کپتان فاطمہ ثنا اور سعدیہ اقبال نے بالترتیب38 اور 47 رنز دے کر دو دو وکٹیں حاصل کیں۔
پاکستان کی اننگز شروع سے ہی مشکلات کا شکار ہو گئی٬ اوپنر منیبہ علی 2 صدف شمس 6 اور عالیہ ریاض2 رنز بناکر آؤٹ ہوگئیں جس کے بعد سدرہ امین اور نتالیہ پرویز نے چوتھی وکٹ کی شراکت میں 69 رنز کا اضافہ کیا۔سدرہ امین نے عمدہ بیٹنگ کرتے ہوئے 9 چوکوں اور ایک چھکے کی مدد سے 81 رنز سکور کیے۔نتالیہ پرویز نے 33 رنز بنائے جس میں 4 چوکے شامل تھے۔کپتان فاطمہ ثنا 2 سدرہ نواز 14 ڈیانا بیگ 9 جبکہ رامین شمیم اور سعدیہ اقبال بغیر کوئی رن بنائے آؤٹ ہوئیں۔بھارت کی کرانتی گاؤد سب سے کامیاب بولر رہیں انہوں نے 20 رنز دے کر 3 وکٹیں حاصل کیں اور پلیئر آف دی میچ قرار پائیں۔دیپتی شرما نے بھی 45 رنز دے کر 3 وکٹیں حاصل کیں۔
پاکستان ویمنز ٹیم ورلڈ کپ میں اپنا تیسرا میچ 8 اکتوبر کو آسٹریلیا کے خلاف کھیلے گی۔
