: محمد ندیم قیصر (ملتان)
: تفصیلات
آئی سی سی ویمنز ورلڈ کپ :پاکستان کو مسلسل تیسری شکست٬ مشکلات سے دوچار آسٹریلیا کو پلیئر آف دی میچ بیتھ مونی فتح کے ٹریک پر لے آئیں انہوں نے نہ ۔ صرف سنچری بنائی بلکہ کنگ کے ہمراہ نویں وکٹ کیلئے ریکارڈ پارٹنرشپ قائم کی۔
آئی سی سی ویمنز ورلڈ کپ میں عالمی چیمپئن آسٹریلیا ویمنز نے پاکستان ویمنز کو 107 رنز سے ہرایا تو بنگلہ دیش ٬ بھارت کے بعد آسٹریلیا کے ہاتھوں پاکستان کی یہ مسلسل تیسری شکست تھی٬ اس میچ کی خاص بات بیتھ مونی کی سنچری اور ایلانا کنگ کے ساتھ ریکارڈ پارٹنرشپ تھی۔ بیتھ مونی پلیئر آف دی میچ قرار پائیں۔
بدھ کے روز کولمبو کے پریماداسا سٹیڈیم میں کھیلے گئے ڈے اینڈ نائٹ میچ میں فاطمہ ثنا نے ٹاس جیت کر آسٹریلیا کو پہلے بیٹنگ دی تو آسٹریلیا نے مقررہ 50 اوورز میں 9 وکٹوں پر 221 رنز بنائے۔پاکستان ویمنز جواب میں 36 اعشاریہ 3 اوورز میں 114 رنز بناکر آؤٹ ہوگئی۔
آسٹریلیا کی اننگز میں 30 رنز کی اوپننگ پارٹنرشپ کے بعد پاکستانی بولرز کی گرفت مضبوط ہوتی چلی گئی تھی اور انہوں نے 76 رنز پر 7 وکٹیں حاصل کرلی تھیں لیکن بیتھ مونی کی سنچری نے صورتحال بدل دی۔انہوں نے11 چوکوں کی مدد سے109 رنز سکور کیے جو ویمنز ون ڈے انٹرنیشنل میں ان کی پانچویں سنچری ہے۔ انہوں نے کم گارتھ کے ساتھ آٹھویں وکٹ کی شراکت میں39 رنز کا اضافہ کیا۔ کم گارتھ 11 رنز بناکر آؤٹ ہوئیں۔مونی نے کنگ کے ساتھ نویں وکٹ کی شراکت میں 106 رنز کا اضافہ کیا جو ویمنز ون ڈے انٹرنیشنل میں اس وکٹ کی ریکارڈ پارٹنرشپ ہے۔ کنگ تین چھکوں اور تین چوکوں کی مدد سے51 رنز بناکر ناٹ آؤٹ رہیں۔
پاکستان کی باؤلنگ میں لیفٹ آرم سپنر نشرہ سندھو نے 37 رنز دے کر 3 وکٹیں حاصل کیں۔ آف سپنر رامین شمیم نے 29 اور فاطمہ ثنا نے 49 رنز دے کر دو دو کھلاڑیوں کو آؤٹ کیا۔پاکستان کی اننگز میں سدرہ امین 35 رنز کے ساتھ ٹاپ سکورر رہیں۔رامین شمیم 15 رنز بناکر آؤٹ ہوئیں۔منیبہ علی3 ۔ صدف شمس5 ۔ سدرہ نواز5 نتالیہ پرویز ایک ایمان فاطمہ صفر اور کپتان فاطمہ ثنا اور نشرہ سندھو گیارہ گیارہ رنز بناسکیں۔آسٹریلیا کی باؤلر کم گارتھ نے 14 رنز دے کر 3 وکٹیں حاصل کیں۔میگن شوٹ اور انابیل سدر لینڈ نے دو دو کھلاڑیوں کو آؤٹ کیا۔پاکستان ویمنز ٹیم اپنا چوتھا میچ 15 اکتوبر کو انگلینڈ ویمنز کے خلاف کھیلے گی۔
