: محمد ندیم قیصر (ملتان)
: تفصیلات
پاکستان اور جنوبی افریقہ کے درمیان پہلا ٹیسٹ آج سے لاہور میں شروع ۔ مہمان ٹیم کو ریکارڈ ٹیبل پر برتری حاصل ہے ۔پاکستان کرکٹ ٹیم آئی سی سی ورلڈ ٹیسٹ چیمپئن شپ 27-2025ء کا آغاز جنوبی افریقہ کے خلاف ٹیسٹ سیریز سے کررہی ہے جو اس وقت آئی سی سی ورلڈ ٹیسٹ چیمپئن بھی ہے۔
دونوں ٹیموں کے درمیان دو ٹیسٹ میچوں کی سیریز کا پہلا ٹیسٹ میچ اتوار سے قذافی سٹیڈیم لاہور میں کھیلا جائے گا۔دوسرا ٹیسٹ میچ 20 اکتوبر سے راولپنڈی میں کھیلا جائے گا جس کے بعد دونوں ٹیمیں ون ڈے اور ٹی ٹوئنٹی سیریز بھی کھیلیں گی۔
پاکستان کرکٹ ٹیم کی قیادت شان مسعود کررہے ہیں٬ ٹیمبا باووما کے ان فٹ ہونے کے سبب مہمان ٹیم کی قیادت ایڈین مارکرم کررہے ہیں۔
پاکستان ٹیم کے کپتان شان مسعود کا کہنا ہے کہ ہر ٹیم کی یہ خواہش اور کوشش ہوتی ہے کہ وہ چیمپئن شپ جیتے اسوقت ہماری یہ کوشش ہے کہ ہم چیمپئن شپ کا آغاز اچھے طریقے سے کریں اور اسوقت ہمارے سامنے وہ ٹیم ہے جس نے یہ چیمپئن شپ جیتی ہوئی ہے اور ہم اس ٹیم کے خلاف اپنی ہوم کنڈیشنز میں کھیل رہے ہیں جو ہمارے لیے ایک اچھا موقع ہے۔
شان مسعود کا کہنا ہے کہ کسی بھی چیمپئن شپ میں کھیلتے ہوئے آپ کی صلاحیتوں کا امتحان ہوتا ہے اور یہ ہمارے لیے خود کو پرکھنےاور آزمانے کا اچھا موقع فراہم کررہی ہے۔
جنوبی افریقہ کے کپتان ایڈین مارکرم کا کہنا ہے کہ انہیں ورلڈ ٹیسٹ چیمپئن شپ کا آغاز پاکستان کے ساتھ کرتے ہوئے خوشی ہورہی ہے اور وہ اس چیلنج کے لیے تیار ہیں۔ یہ ایک نیا آغاز ہے اور تمام کھلاڑی صحیح سمت میں آگے بڑھنے کے لیے ُپرجوش ہیں۔
پاکستان اور جنوبی افریقہ کی ٹیسٹ سیریز کے لیے سری لنکا کے رنجن مدوگالے آئی سی سی میچ ریفری ہونگے ٬ پہلے ٹیسٹ میں آن فیلڈ امپائر آسٹریلیا کے راڈنی ٹکر اور نیوزی لینڈ کے کرسٹوفر براؤن ہونگے۔ بنگلہ دیش کےسیکت شرف الدولہ تھرڈ امپائر اور پاکستان کے فیصل آفریدی فورتھ امپائر کے فرائض انجام دیں گے۔دونوں ٹیسٹ میں جنرل ۔فرسٹ کلاس ۔پریمیئم اور وی آئی پی کے انکلوژرز میں شائقین کا داخلہ مفت ہوگا۔
پاکستان اور جنوبی افریقہ کے درمیان30 ٹیسٹ میچ کھیلے جاچکے ہیں جن میں پاکستان نے6 اور جنوبی افریقہ نے17 جیتے ہیں 7 ٹیسٹ ڈرا ہوئے ہیں٬ پاک سرزمین پر دونوں ٹیموں کے درمیان کھیلے گئے9 ٹیسٹ میچوں میں پاکستان نے3 اور جنوبی افریقہ نے2 جیتے ہیں 4 ٹیسٹ ڈرا ہوئے ہیں۔دونوں ممالک کے درمیان پاکستان میں آخری ٹیسٹ سیریز 2021ء میں کھیلی گئی تھی جو پاکستان نے دو صفر سے جیتی تھی۔پاکستان سکواڈ ان کھلاڑیوں پر مشتمل ہے۔
شان مسعود ( کپتان ) عبداللہ شفیق۔ ابرار احمد۔ آصف آفریدی۔ بابراعظم۔ حسن علی۔ امام الحق۔ کامران غلام۔ خرم شہزاد۔ محمد رضوان۔ نعمان علی۔ روحیل نذیر۔ ساجد خان۔ سلمان علی آغا۔ سعود شکیل اور شاہین شاہ آفریدی۔
