: محمد ندیم قیصر (ملتان)
: تفصیلات
لاہور بلوز نے قومی مینز انڈر 19 ون ڈے کپ جیت لیا٬فائنل میں راولپنڈی کو 7 وکٹوں سے شکست کا سامنا کرنا پڑا٬ جمعرات کے روز ملتان کرکٹ سٹیڈیم میں کھیلے گئے فائنل میں راولپنڈی نے ٹاس جیت کر پہلے بیٹنگ کی اور پوری ٹیم 44 اعشاریہ ایک اوورز میں 142 رنز بناکر آؤٹ ہوگئی۔علی مہدی رضوی 36 رنز کے ساتھ ٹاپ بیٹسمین رہے۔ عبدالقادر نے26 رنز بنائے۔ نقیب اللہ نے16 اور ابتسام اظہر نے 25 رنز دے کر تین تین وکٹیں حاصل کیں۔
جوابی بیٹنگ میں لاہور بلوز نے 39 اعشاریہ 4 اوورز میں تین وکٹوں کے نقصان پر مطلوبہ سکور پورا کرلیا۔خضر بٹ نے 7 چوکوں کی مدد سے 46 رنز بنائے ۔انہوں نے جہانگیر بلال کے ساتھ تیسری وکٹ کی شراکت میں 69 رنز کا اضافہ کیا۔جہانگیر بلال نے 7 چوکوں کی مدد سے56 رنز کی اننگز کھیلی اور وہ آؤٹ نہیں ہوئے۔ نقیب اللہ پلیئر آف دی میچ قرار پائے۔
لاہور بلوز کے کپتان علی حسن بلوچ نے پلیئر آف دی ٹورنامنٹ کا ایوارڈ حاصل کیا۔فیصل آباد کے مومن قمر بہترین بولر۔ علی حسن بلوچ بہترین بیٹر اور کراچی وائٹس کے سجاد احمد بہترین وکٹ کیپر قرار پائے۔فاتح ٹیم کو بیس لاکھ روپے اور رنراپ کو دس لاکھ روپے کی انعامی رقم ملی۔قومی انڈر19 ون ڈے کپ میں اٹھارہ ٹیموں نے حصہ لیا۔ لاہور بلوز گروپ اے میں اور پنڈی گروپ بی میں ٹاپ رہ کر فائنل میں پہنچی تھیں۔
