ہمشیرہ کے بعد بھائی کو بھی زکریا یونیورسٹی کے تدریسی شعبہ کی سربراہی مل گئی٬ا ڈاکٹر محمد خرم افضل  ہیومن نیوٹریشن ڈیپارٹمنٹ کےچیئرمین مقرر 

: محمد ندیم قیصر (ملتان)

: تفصیلات

ہمشیرہ کے بعد بھائی کو بھی زکریا یونیورسٹی کے تدریسی شعبہ کی سربراہی مل گئی٬ایسو سی ایٹ پروفیسر ڈاکٹر محمد خرم افضل کو ہیومن نیوٹریشن ڈیپارٹمنٹ کا چیئرمین مقرر کردیا گیا٬ وائس چانسلر زکریا یونیورسٹی ملتان پروفیسر ڈاکٹر محمد زبیر نے پروفیسر ڈاکٹر محمد خرم افضل کو نئی ذمہ داریاں تفویض کی ہیں دریں اثناء ڈاکٹر محمد خرم افضل نے اپنے عہدے کا چارج سنبھال لیا ہے ۔

پروفیسر ڈاکٹر خرم افضل کا تعلق ملتان کے ایک معروف تعلیمی گھرانے سے ہے ان کے والد پروفیسر ڈاکٹر افضل خان نے بانی ڈین فیکلٹی آف فارمیسی بہالدین زکریا یونیورسٹی کے طور پر خدمات انجام دیں۔ حال ہی میں ان کی ہمشیرہ پروفیسر ڈاکٹر ثمینہ افضل کو ڈین فیکلٹی آف فارمیسی مقرر کیا گیا ہے

پروفیسر ڈاکٹر خرم افضل نے کہا کہ وہ اپنی تمام صلاحیتوں کو بروئے کار لاتے ہوئے ڈیپارٹمنٹ آف ہیومن نیوٹریشن کی ترقی و طلبہ وطالبات کی بہترین تعلیم وتربیت کیلئے کام کریں گے۔ڈیپارٹمنٹ ہیومن نیوٹریشن کو مزید بہتر بنایا جائے گا جدید دور کے تقاضوں سے ہم آہنگ کیا جائے گا طلبہ وطالبات کو اعلیٰ معیار کی تعلیمی سہولیات فراہم کی جائیں گی تاکہ ہمارے طلبہ و طالبات عملی زندگی میں جا کر ملک وقوم کی اچھے انداز میں خدمت کر سکیں۔ ڈاکٹر خرم افضل نے اس عزم کا اعادہ کیا کہ وہ شعبے کو تعلیم و تحقیق کی نئی منزلوں سے روشناس کرائیں گے۔ اس موقع پر اساتذہ اور طلبہ نے ڈاکٹر خرم افضل کو مبارک باد دی اور نیک تمناؤں کا اظہار کیا۔