Admin
:محمد ندیم قیصر (ملتان)
: تفصیلات
وزیراعظم محمد شہباز شریف کی زیر صدارت رواں مالی سال کے وفاقی ترقیاتی منصوبوں کے حوالے سے منعقدہ جائزہ اجلاس میں متعلقہ حکام کو ہدایت کی گئی ہے کہ وہ عوامی فلاح کے ترقیاتی منصوبوں بالخصوص صاف پانی، بجلی، مواصلات، تعلیم کے منصوبوں میں شفافیت کیلئے تھرڈ پارٹی ویلیڈیشن یقینی بنائی جائے، تاخیر کے شکار منصوبوں کی تکمیل کو جلد از جلد یقینی بنائیں۔ مکمل اور تکمیل کے قریب منصوبوں میں اعلیٰ معیار یقینی بنانے کے لیے تھرڈ پارٹی ویلیڈیشن کی ہدایت.بھی کی گئی۔ مزید کہا گیا کہ تمام منصوبوں میں عوامی سہولت کو مرکزی حیثیت دیتے ہوئے معیاری سہولیات کی فراہمی یقینی بنائی جائے۔وزیراعظم نے کہا کہ تاخیر کا شکار منصوبوں کو جلد از جلد مکمل کیا جائے۔واضح کیا گیا کہ گلگت بلتستان، آزاد جموں و کشمیر اور تمام صوبوں میں وفاق کی جانب سے دانش سکولوں جیسے معیاری تعلیمی مراکز کی تعمیر حکومت کی اولین ترجیحات میں شامل ہے۔
اجلاس میں کہا گیا کہ تعلیمی مراکز رواں مالی سال کے ترقیاتی منصوبوں کا انتہائی اہم حصہ ہیں جس کا مقصد معاشی طور پر کمزور طبقے کے بچوں کو عالمی معیار کی تعلیم و تربیت، یکساں ترقی کے مواقع فراہم کرنا ہے۔آبی ذخائر ملکی سالمیت کا محور ہیں اور اس کے لیے متعدد منصوبے زیر تعمیر ہیں۔کراچی اور اسلام آباد میں ٹیکنالوجی پارکس کی تعمیر سے پاکستان خطے و عالمی سطح پرانفارمیشن ٹیکنالوجی کے لیے ایک اہم معاشی مرکز بنے گا۔سپیشل اکنامک زونز کی تعمیر حکومت پاکستان کے ملکی معیشت کے ویژن کا کلیدی عنصر ہے۔
اجلاس میں وزیراعظم کو تکمیل شدہ ترقیاتی منصوبوں اور رواں مالی سال میں جاری منصوبوں کے حوالے سے بریفنگ دی گئی اور بتایا گیا کہ پورے ملک میں مواصلات، آئی ٹی، آبی ذخائر، بجلی، تعلیمی مراکز، ہسپتالوں جیسے متعدد منصوبے مکمل ہو چکے ہیں اور نئے منصوبوں پر کام تیزی سے جاری ہے۔اجلاس میں وفاقی وزیر ترقی و منصوبہ بندی ڈاکٹر احسن اقبال، وفاقی وزیر اقتصادی امور احد خان چیمہ، وفاقی وزیر اطلاعات و نشریات عطا اللہ تارڑ اور متعلقہ اداروں کے اعلیٰ افسران نے بھی شرکت کی۔
