: محمد ندیم قیصر (ملتان)
: تفصیلات
فیلڈ مارشل سید عاصم منیر، نِشانِ امتیاز (ملٹری)، ہلالِ جرات، چیف آف آرمی اسٹاف (سی او اے ایس) نے قصور سیکٹر اور جلالپور پیروالا، ملتان میں قائم فلڈ ریلیف کیمپ کا دورہ کیا تاکہ موجودہ سیلابی صورتحال اور جاری امدادی سرگرمیوں کا جائزہ لے سکیں۔ قصور اور ملتان کے سیلاب سے متاثرہ علاقوں کے دورے کا مقصد سول انتظامیہ اور فوج کے درمیان ہم آہنگی کو بڑھانا تھا تاکہ متاثرہ عوام کو مؤثر امداد فراہم کی جا سکے۔ اس موقع پر چیف سیکرٹری پنجاب اور سول انتظامیہ کے دیگر سینئر حکام بھی موجود تھے۔
دورے کے دوران، آرمی چیف کو زمینی صورتحال پر تفصیلی بریفنگ دی گئی، جس میں سیلاب زدہ علاقوں میں جاری ریسکیو اور ریلیف آپریشنز کی تفصیلات شامل تھیں۔ سول انتظامیہ سے بات چیت کرتے ہوئے انہوں نے گڈ گورننس اور عوام دوست ترقی کی اہمیت پر زور دیا۔ انہوں نے کہا کہ لوگوں کو بار بار آنے والے سیلاب کی تباہ کاریوں سے بچانے کے لیے درکار تمام اقدامات بشمول بنیادی ڈھانچے کی تعمیرات کو تیز کیا جانا چاہیے۔ انہوں نے کہا کہ ریاست ہر سال قیمتی جانوں اور املاک کے نقصان کی متحمل نہیں ہو سکتی۔
انہوں نے سیلاب زدہ برادریوں کو درپیش مسائل کے حل میں سول اور فوج کے مربوط اقدامات کی اہمیت کو اجاگر کیا اور عوامی فلاح کے لیے تمام اقدامات کی مکمل حمایت کا عزم دہراتے ہوئے پاکستان آرمی کے غیر متزلزل عزم کو واضح کیا۔
سی او اے ایس نے ان متاثرین سے بھی ملاقات کی جنہیں پاکستان آرمی اور سول انتظامیہ نے کامیابی سے محفوظ مقامات پر منتقل کیا تھا۔ اس موقع پر انہوں نے متاثرین کو یقین دلایا کہ ان کی دوبارہ آبادکاری اور بحالی میں مکمل تعاون فراہم کیا جائے گا۔ متاثرین نے بروقت مدد فراہم کرنے پر پاکستان آرمی کا تہہ دل سے شکریہ ادا کیا۔
آرمی چیف نے ریلیف آپریشنز میں مصروف فوجی جوانوں، ریسکیو 1122 کے عملے اور پولیس حکام سے بھی ملاقات کی۔ انہوں نے ان کے بلند حوصلے، عملی تیاری اور انتہائی مشکل حالات میں قوم کی خدمت کے لیے ثابت قدمی کو سراہا۔ انہوں نے ان کی شب و روز کی محنت اور سول انتظامیہ کے ساتھ قریبی رابطے میں عوام کو بروقت امداد فراہم کرنے کی کاوشوں کو خراج تحسین پیش کیا۔
سی او اے ایس نے لاہور-قصور اور ملتان-جلالپور پیروالا کے محاذوں پر سیلاب سے متاثرہ علاقوں کا فضائی جائزہ بھی لیا تاکہ نقصانات اور جاری امدادی سرگرمیوں کا براہِ راست مشاہدہ کیا جا سکے۔
سیلاب متاثرہ علاقوں میں آمد پر فیلڈ مارشل کا استقبال لاہور اور ملتان کور کے کور کمانڈرز نے کیا۔
