لاہور کے بدنام زمانہ انڈر ورلڈ گروپوں بٹ اور بالاج کی خونریز دشمنی کا ایک اور کردار تعریف بٹ عرف تیفی بٹ اپنے انجام کو پہنچ گیا

: محمد ندیم قیصر (ملتان)

: تفصیلات

لاہور کے بدنام زمانہ انڈر ورلڈ گروپوں بٹ اور بالاج کی خونریز دشمنی کا ایک اورکردار تعریف بٹ عرف تیفی بٹ اپنے انجام کو پہنچ گیا٬ ٹیپو ٹرکاں والے کے بیٹے امیر بالاج کے ڈیڑھ سال پرانے مقدمہ قتل کا ایک ملزم احسن جو کہ امیر بالاج کے قریبی دوستوں میں شمار کیا جاتا تھا اسے وقوعہ کے روز جائے واردات پر موجودگی کی ریکی کرنے کے الزام میں گرفتار کیا گیا تھا اور وہ بھی مبینہ طور پر پولیس مقابلے میں پہلے ہی مارا جا چکا ہے. مقدمہ قتل میں ملوث مفرور تیفی بٹ کو اشتہاری قرار دیا جا چکا تھا اور انٹرپول کے ذریعے حال ہی میں اس کی گرفتاری دوبئی سے عمل میں لائی گئی تھی. تیفی بٹ کے پولیس مقابلہ میں مارے جانے کی ایف آئی آر بھی درج کر لی گئی ہے۔

تیفی بٹ کے پولیس مقابلے میں مارے جانے کی تفصیلات کے مطابق پنجاب پولیس کے کرائم کنٹرول ڈیپارٹمنٹ (سی سی ڈی) سے مبینہ مقابلے میں امیر بالاج قتل کیس کا مرکزی ملزم خواجہ تعریف گلشن عرف طیفی بٹ ہلاک ہوگیا٬ اس مبینہ مقابلے کی مزید تفصیلات کے مطابق خواجہ تعریف گلشن عرف تیفی بٹ کو دبئی سے پاکستان لانے کے بعد لاہور منتقل کیا جارہا تھا کہ رحیم یار خان کے قریب ملزم کے ساتھیوں نے حملہ کردیا اور اس مبینہ مقابلے میں ملزم تیفی بٹ اپنے ہی ساتھیوں کی فائرنگ کا نشانہ بن گیا۔تیفی بٹ کو پاکستان منتقلی سے قبل دبئی کی عدالت میں پیش کیا گیا تھا، دبئی کی عدالت کے قاضی نے تیفی بٹ سے پاکستان جانے سے متعلق سوال کیا تھا، جس پر تیفی بٹ نے پاکستان جانے اور مقدمات کا سامنا کرنے کا کہا تھا۔

دیرینہ دشمنی میں 18فروری 2024ء کو بھینٹ چڑھنے والے امیر بالاج ٹیپو کے بعد دو مرکزی ملزم بھی پولیس مقابلے مارے گئے

دیرینہ دشمنی میں 18فروری 2024ء کو بھینٹ چڑھنے والے امیر بالاج ٹیپو کے بعد دو مرکزی ملزم بھی پولیس مقابلے مارے گئے٫ لاہور کی معروف کاروباری شخصیت ٹیپو ٹرکاں والے کے بیٹے امیر بالاج ٹیپو کو 18 فروری 2024 کو شادی کی تقریب میں فائرنگ کر کے قتل کر دیا گیا تھا٬ اس واردات میں حملہ آور بھی مقتول امیر بالاج کے سکیورٹی گارڈ کی جوابی فائرنگ میں موقع پر ہی مارا گیا تھا۔ ٹیپو ٹرکاں والا کا بیٹا امیر بالاج ٹیپو، ٹھوکر نیاز بیگ کے قریب نجی ہاؤسنگ سوسائٹی میں سابق ڈی ایس پی اکبر اقبال بلا کے بیٹے کی شادی کی تقریب میں شریک تھا۔شادی کی تقریب کے دوران وہاں موجود ایک حملہ آور نے فائرنگ کردی تھی، جس سے امیر بالاج ٹیپو سمیت 3 افراد زخمی ہوگئے تھے، جنہیں ہسپتال منتقل کیا گیا تھا۔
۔
اپنے ہی گراتے ہیں نشیمن پر بجلیاں٫ دوست ہی دشمنوں کا مخبر نکلا

اگست 2024 میں امیر بالاج ٹیپو قتل کیس کا مرکزی ملزم احسن شاہ مبینہ مقابلے میں ہلاک ہو گیا تھا، احسن شاہ مقتول امیر بالاج ٹیپو کا قریبی دوست تھا، جس پر الزام تھا کہ اس نے گوگی بٹ کی ملی بھگت سے امیر بالاج کی ریکی کی تھی۔ڈی ایس پی آرگنائزڈ کرائم یونٹ نے بتایا تھا کہ ملزم احسن شاہ اپنے ساتھیوں کی فائرنگ سے زخمی ہوا تھا، جسے ہسپتال منتقل کیا گیا تاہم وہ جانبر نہیں ہو سکا تھا۔پولیس کا کہنا تھا کہ احسن شاہ کو نشاندہی کے لیے لے جایا جا رہا تھا کہ اس کے بھائی نے نامعلوم ساتھیوں کے ہمراہ اسے چھڑوانے کے لیے حملہ کر دیا، اس دوران مبینہ مقابلے کے دوران احسن شاہ زخمی ہوا اور زخموں کی تاب نہ لاتے ہوئے جاں بحق ہو گیا۔
دریں اثناء ستمبر 2025 میں مشترکہ تحقیقاتی ٹیم (جے آئی ٹی) کی رپورٹ میں انکشاف کیا گیا تھا کہ گوگی بٹ نے امیربالاج ٹیپو کو قتل کروانے کے لیے منصوبہ بندی کی تھی۔ ذرائع کے مطابق خواجہ عقیل عرف گوگی بٹ امیربالاج قتل کیس کے مرکزی ملزم تیفی بٹ سے رابطے میں رہا تھا، گوگی بٹ ٹیپو خاندان کے تمام سابقہ قتل کیس میں بھی نامزد ملزم رہا ہے۔جے آئی ٹی آئندہ پیشی پر گوگی بٹ کی ضمانت خارج کروانے کی استدعا کرے گی۔

امیر بالاج کے قتل کے بعد ملزم خواجہ عقیل عرف گوگی بٹ فرار ہو گیا تھا، بعد ازاں ملزم نے ضمانت حاصل کرلی تھی اور 15 ستمبر تک عبوری ضمانت پر ہے جبکہ ملزم تیفی بٹ تاحال اشتہاری ملزم تھا، جسے دبئی سے حراست میں لے کر پاکستان منتقل کرنے پر کام شروع کر دیا گیا ہے۔

یاد رہے کہ امیر بالاج ٹیپو کے والد امیر محمد خان المعروف ٹیپو ٹرکاں والے 22 مارچ 2010 کو لاہور ایئرپورٹ پر قاتلانہ حملے میں جاں بحق ہوگئے تھے، وہ عمرہ کی ادائیگی کے بعد سعودی عرب سے واپس آئے تھے اور انہیں ایئرپورٹ کی پارکنگ میں گولیوں کا نشانہ بنایا گیا تھا۔ْ