سول اور فوجی قیادت ایک صفحہ پر ۔ مہنگائی کو کم کرتے ہوئے آئی ایم ایف شرائط بھی سامنے ہیں:رانا قاسم نون

: محمد ندیم قیصر (ملتان)

: تفصیلات

وفاقی وزیر و چیئرمین کشمیر کمیٹی رانا قاسم نون نے کہا ہے کہ سول اور فوجی قیادت ایک صفحے پر ہیں۔حکومت عوامی مسائل کو حل کرنے کیلئے دن رات کوششوں میں ہیں۔آئی ایم ایف کی شرائط کو دیکھتے ہوئے مہنگائی کو کم کیا جارہا ہے۔ملتان آمد پر میڈیا سے گفتگو کرتے ہوئے انہوں نے مزید کہا کہ حکومت کو جنوبی پنجاب کی محرومیوں کا احساس ہے ۔ یہاں کے مسائل کے کیلئے ہم نے ہمیشہ آواز بلند کی۔اگر ایک صوبہ بنایا گیا تو دوسرے بھی بنانے پڑیں گے۔جنوبی پنجاب کا بنیادی مسئلہ یہاں غربت اور پسماندگی کو دور کرنا ہے،جس کیلئے کوششیں جاری ہیں۔رانا قاسم نون نے کہا کہ یہاں کے کسانوں کی مشکلات کا بھی اندازہ ہے۔جس کی بنیادی وجہ موسمیاتی تبدیلی ہے۔حکومت اس حوالے سے اقدامات کر رہی ہے،کیونکہ زرعی ترقی کے بغیر ہم آگے نہیں بڑھ سکتے۔پریس کانفرنس میں مسلم لیگ نون کے ضلعی صدر بلال بٹ،جنرل سیکریٹری اطہر ممتاز سمیت مقامی رہنما اورکارکنان بھی ان کے ہمراہ تھے۔

بلوچستان میں حالیہ دہشت گردی کا ذمہ دار بھارت اور مودی سرکار۔عالمی برادری مسئلہ کشمیر حل کروائے: وفاقی وزیر

وفاقی وزیر رانا محمد قاسم نون نے مزید کہا کہ بھارتی سرکار پاکستان بالخصوص بلوچستان میں فتنتہ الہندوستان فساد برپا کر رہی ہے۔بلوچستان میں حالیہ دہشت گردی کا ذمہ دار بھارت اور مودی سرکار ہیں، وفاقی وزیر کا مزید کہنا تھا کہ بلوچستان میں ہمارے معصوم لوگوں کو شہید کیا جا رہا ہے جس کی ذمہ دار مودی سرکار ہے۔اس مداخلت کو فوری بند کیا جائے۔ چیئرمین کشمیر کمیٹی رانا قاسم نون نے کہا کہ مقبوضہ کشمیراورغزہ میں انسانی حقوق کی پامالی پرپوری دنیا کو نوٹس لینا ہوگا۔بھارت کو یہ جان لینا چاہیے کہ کشمیر پاکستان کا حصہ ہے اور ان شاءاللہ رہےگا۔پاکستان کشمیر کے بغیر ادھورا ہے۔کشمیر کا مسئلہ اب صرف پاکستان اور بھارت کے درمیان نہیں بلکہ اب یہ ایک بین الاقوامی مسئلہ ہے جسے ہر صورت اقوام متحدہ کی قراردادوں کے مطابق حل ہونا چاہیئے۔رانا قاسم نون نے کشمیری حریت رہنماؤں کو خراج تحسین پیش کرتے ہوئے کہا کہ ان کی قربانیاں کبھی رائیگاں نہیں جائیں گی، پوری قوم سید شبیر احمد شاہ،یاسین ملک،سید علی گیلانی اور دیگر رہنماؤں کی جدوجہد آزادی کو سلام پیش کرتی ہے۔

وفاقی وزیر کا آبائی علاقہ شجاع آباد اور جلال پور پیر والا کو جاتے ہوئے شیر شاہ ٹول پلازہ پر شاندار استقبال ۔ پھولوں کی پتیاں نچھاور ۔

وفاقی وزیر کا آبائی علاقہ شجاع آباد اور جلال پور پیر والا کو جاتے ہوئے شیر شاہ ٹول پلازہ پر شاندار استقبال ۔ علاقہ کی عوام کی طرف سے پھولوں کی پتیاں نچھاور کی گئیں ۔اس موقع پر گفتگو کرتے ہوئےرانا قاسم نون نے کہا کہ علاقہ کے مسائل کو ترجیح بنیادوں پر حل کیا جائے گا انہوں نے میڈیا سوال جواب سیشن میں پہلگام واقعہ پر بھی گفتگو کی اور کہا کہ پاکستان نے اس کی غیرجانبدارانہ انکوائری کی پیشکش کی مگر بھارت نے ہٹ دھرمی کا مظاہرہ کیا اور جنگ کو ترجیح دی۔جس میں مودی کو شکست کا سامنا کرنا پڑا۔اس عظیم فتح پر پوری پاکستانی قوم اور دنیا نے وزیراعظم شہباز شریف،فیلڈ مارشل جنرل عاصم منیر اور افواجِ پاکستان کو خراجِ تحسین پیش کیا۔پاک افواج کی شاندار کارکردگی اور فتح سے پوری دنیا میں پاکستان کا وقار بلند ہوا ہے۔ اس کامیابی پر وزیر اعظم شہباز شریف اور فیلڈ مارشل عاصم منیر مبارکباد کے مستحق ہیں، پوری قوم انہیں خراجِ تحسین پیش کر رہی ہے۔انہوں نے کہا کہ حکومت نے اپنی بہتر پالیسیوں کی وجہ سے مسئلہ کشمیر کو اجاگر کیا۔پوری دنیا نے یہ تسلیم کیا ہے کہ پاکستان اور بھارت کے درمیان اس بنیادی مسئلے کو حل کئے بغیر تعلقات معمول پر نہیں آ سکتے۔رانا قاسم نون نے مزید کہا کہ ہمیں اپنی افواج پر فخر ہے جو اپنی جانوں کا نذرانہ دے کر اپنے ملک کی حفاظت کر رہے ہیں۔