Admin
:محمد ندیم قیصر (ملتان)
:تفصیلات
خضدار میں سکول بس پر خودکش حملہ میں 3 بچوں سمیت 5 افراد شہید اور 38 زخمی ہو گئے۔وزیر اعظم۔وزیر داخلہ نے سانحہ کی شدید مذمت کی ہے۔ تفصیلات کے مطابق حملہ آور نے بس کے قریب خود کو دھماکے سے اُڑایا، بس مکمل طور پر تباہ ہو گئی، بعض بچوں کی حالت تشویش ناک بتائی جا رہی ہے۔بلوچستان کے شہر خضدار میں یہ افسوس ناک زیرو پوائنٹ پر پیش آیا، جہاں ایک سکول بس معمول کے مطابق بچوں کو لے جا رہی تھی کہ اچانک زوردار دھماکے نے قیامت صغریٰ کا منظر پیش کردیا۔جائے وقوع پر موجود عینی شاہدین نے بتایا کہ دھماکے کی شدت اتنی زیادہ تھی کہ بس مکمل طور پر تباہ ہو گئی اور زخمی بچے سڑک پر جا گرے۔انتظامیہ کے مطابق ابتدائی تحقیقات سے یہ بات سامنے آئی ہے کہ یہ حملہ خودکش نوعیت کا تھا، جس میں حملہ آور نے بس کے قریب خود کو دھماکے سے اڑا دیا۔دھماکے کی اطلاع ملتے ہی ریسکیو ٹیموں نے جائے وقوع پہنچ کر زخمیوں کو فوری طور پر قریبی اسپتال منتقل کیا، جہاں انہیں طبی امداد فراہم کی جا رہی ہے۔ کچھ بچوں کی حالت تشویشناک ہے۔دوسری جانب پولیس اور سکیورٹی اداروں نے فوری طور پر علاقے کو گھیرے میں لے کر سرچ آپریشن شروع کر دیا ہے۔ جائے وقوع سے شواہد اکٹھے کیے جا رہے ہیں اور دہشت گرد کے سہولت کاروں کی تلاش جاری ہے۔
بھارتی سرپرستی میں سکول بس پر بزدلانہ حملے کی شدید مذمت۔وزیراعظم کا اساتذہ اور معصوم طلبہ کی شہادت پر رنج و الم کا اظہار ۔
وزیراعظم محمد شہباز شریف نے خضدار میں سکول بس پر بھارتی سرپرستی میں کام کرنے والے دہشتگردوں کے بزدلانہ حملے کی شدید الفاظ میں مذمت کی ہے اور دھشتگردانہ حملے میں معصوم بچوں اور انکے اساتذہ کی شہادت پر رنج و ملال کا اظہار کیا ہے۔ بچوں کے والدین کے ساتھ ہمدردی کا اظہار کرتے ہوئے انہوں نے متعلقہ حکام کو ذمہ داران کے فوری تعین اور انہیں قرار واقعی سزا دلوانے کی ہدایت بھی کی ہے ۔سانحہ میں زخمیوں کو ترجیح بنیادوں پر فوری طبی امداد فراہم کرنے کے ہدایت کی گئی ہے۔انہوں نے مزید کہا کہ بھارتی سرپرستی میں کام کرنے والے دھشتگردوں کا اسکول بس میں معصوم بچوں پر حملہ انکی بلوچستان میں تعلیم دشمنی کا منہ بولتا ثبوت ہے. دھشتگردوں نے سکول بس پر حملہ کرکے درندگی کی تمام حدیں پار کیں. بھارتی سرپرستی میں پلنے والے ان دھشتگردوں کو ان کے انجام تک پہنچا کر دم لیں گے. انہوں نے مزید کہا کہ بھارتی حمایت یافتہ ان دھشتگردوں کے بلوچستان کے امن کو خراب کرنے کے ناپاک عزائم کو خاک میں ملانے کیلئے کوئی کسر نہیں چھوڑی جائے گی. پاکستان کے مستقبل، ننھے و معصوم بچوں کو نشانہ بنانے والے ان دھشتگردوں کو کیفر کردار تک پہنچایا جائے گا. وزیراعظم نے کہا کہ مجھ سمیت پوری قوم کی ہمدردیاں دھشتگردوں کی بربریت کا نشانہ بننے والے ان معصوم بچوں کے اہل خانہ کے ساتھ ہیں. سیکیورٹی فورسز اور حکومت پاکستان ملک سے دہشتگردی کے مکمل خاتمے کے لیے پر عزم اور متحد ہیں۔
درندہ صفت عناصر کو کسی قسم کی رعایت نہیں دی جائے گی۔ قوم دہشتگردی کے خلاف متحد رہے: وزیر داخلہ محسن نقوی۔
دریں اثنا وفاقی وزیرداخلہ محسن نقوی نے واقعے پر ردعمل کا اظہار کرتے ہوئے کہا کہ یہ حملہ ملک میں بدامنی پیدا کرنے کی گھناؤنی سازش ہے۔ انہوں نے جاں بحق بچوں کے لواحقین سے دلی تعزیت کا اظہار کرتے ہوئے کہا کہ ان درندہ صفت عناصر کو کسی قسم کی رعایت نہیں دی جائے گی۔محسن نقوی نے کہا کہ قوم دہشتگردی کے خلاف متحد رہے کیونکہ دشمن کی یہی کوشش ہے کہ ہمارے اندر تفرقہ پیدا کرے۔ ان کا کہنا تھا کہ ریاست ایسے عناصر کے خلاف مکمل طاقت سے کارروائی کرے گی۔ انہوں نے زخمیوں کی جلد صحت یابی کے لیے بھی دعا کی ہے۔
